Фестываль Kilkim Žaibu заваблівае беларусаў бясплатнымі візамі

Штогадовы Балтыйскі фестываль хэві-метал і фолк музыкі Kilkim Žaibu ў 14-ы раз пройдзе ў Літве 21-23 чэрвеня.

Канцэпцыя фестывалю сумяшчае экстрэмальныя формы рок-музыкі са старажытным фальклорам і акцэнтамі на гісторыі Балтыі, і ў знак павагі старажытных народных традыцый ён адбываецца ў дзень Сонцастаяння, паведамляе generation.by.

Kilkim Žaibu пашырае кола гледачоў і запрашае беларусаў пазнаёміцца са старажытнай культурай балтаў. Наяўнасць мяжы заўсёды ўскладняе жыццё падарожнікам, таму Kilkim Žaibu робіць сур'ёзны крок насустрач беларускім гледачам: па квітку на фестываль, як і ў мінулым годзе, можна атрымаць візу бясплатна.

Kilkim Žaibu - найстарэйшы фестываль у Балтыйскім рэгіёне. Кожны год арганізатары ўдасканальваюць і прапануюць гледачам больш магутную і цікавую праграму - у гэтым годзе выступіць каля 30 гуртоў з розных краін. Ад Беларусі выступіць гурт «Стары Ольса»

Кошт квітка для Беларусі 350-410 тыс. беларускіх рублёў.