Украіна забараніла ўвоз беларускай свініны

(абноўлена - 14:14) Украіна з 7 траўня забараніла ўвоз з Беларусі свіней з-за эпідэміі афрыканскай чумы.

«У сувязі са з'яўленнем у сродках масавай інфармацыі паведамленняў пра гібель жывёл у Баранавіцкім раёне Рэспублікі Беларусь і падазрэннем узнікнення афрыканскай чумы свіней распараджэннем намесніка галоўнага дзяржаўнага інспектара ветэрынарнай медыцыны ад 7 траўня 2013 часова забараняецца да высвятлення абставінаў увоз з гэтай краіны ва Украіну адчувальных да гэтага захворвання жывёл, прадукцыі і сыравіны з іх», - гаворыцца ў паведамленні Дзяржаўнай ветэрынарнай і фітасанітарнай службы Украіны ў аўторак.

Нагадаем, на свінакомплексе «Усходні», які належыць Баранавіцкаму камбінату хлебапрадуктаў, зафіксаваны вялікі падзеж жывёлы. Як паведамлялі рабочыя прадпрыемства, з 70 тысяч галоў 30 тысяч ужо пахавалі. Для знішчэння жывёлы прыцягнулі ўсіх забойшчыкаў, выклікалі нават тых, хто на момант надзвычайнага здарэння знаходзіўся ў адпачынку.

Мясцовыя ўлады і кіраўніцтва катэгарычна абвяргалі любую інфармацыю аб НЗ у СМІ, але пры гэтым раён свінакомплексу быў ачэплены міліцыяй, а мясцовыя жыхары пацвярджалі, што ажыццяўляецца масавае пахаванне жывёл.

Самай распаўсюджанай версіяй таго, што адбываецца, была эпідэмія афрыканскай чумы свіней, якая фіксуецца ў суседніх краінах.

На свінакомплексе «Усходні» ўжо здараліся НЗ, звязаныя з масавым морам жывёлы. Напрыклад, у 2009 годзе там загінула каля 2 тысяч парасятаў.

Афрыканская чума свіней - высокакантагіёзная вірусная хвароба свіней, якая характарызуецца ліхаманкай, цыянозам скуры і шырокімі гемарагіямі ва ўнутраных органах. Належыць да спісу A згодна з Міжнароднай класіфікацыяй заразных хвароб жывёл. Для чалавека афрыканская чума свіней небяспекі не ўяўляе.

Фота: AFP