Ермакова: Такой дэвальвацыі, як у 2011 годзе, не будзе

Але ў 2014 годзе цалкам магчымае правядзенне дэнамінацыі.

Падчас прамой лініі ў рэдакцыі «Народной газеты» Надзея Ермакова распавяла пра планы Нацыянальнага банка на бліжэйшы час. У прыватнасці, яна выказалася наконт магчымай дэвальвацыі і дэнамінацыі беларускага рубля.

«Перадумоў для дэвальвацыі, такой, якая ў нас была ў 2011 годзе, няма», - сказала кіраўнік Нацбанка.

Пры гэтым Ермакова заявіла, што ў 2014 годзе можна будзе весці размову пра дэнамінацыю.

«Пра дэнамінацыю ў наступным годзе можна весці гаворку, калі з інфляцыяй усё будзе нармальна», - сказала Ермакова.

Кіраўнік Нацыянальнага банка Беларусі таксама заявіла пра «неабходнасць асцярожнага зніжэння стаўкі рэфінансавання», якое будзе магчыма толькі ў выпадку стварэння адпаведных умоў у эканоміцы.

«Не трэба спяшацца са зніжэннем стаўкі, гэта можа адбыцца толькі пры пэўных умовах у эканоміцы», - сказала Ермакова.

Гаворачы пра будучага крэдытора Беларусі, кіраўнік Нацбанка заявіла, што гэта будзе не АКФ ЕўрАзЭС. Пры гэтым Ермакова не ўдакладніла, у каго ўлады збіраюцца пазычыць на гэты раз.

«Беларусь пакуль не плануе браць іншых крэдытаў у АКФ ЕўрАзЭС», - сказала яна.

Нагадаем, з заявамі пра адсутнасць прычын для дэвальвацыі напярэдадні крызісу, які абрынуўся на Беларусь два гады таму, выступаў Пётр Пракаповіч, які ў той час займаў пасаду кіраўніка Нацыянальнага банка краіны.

«Пакуль я з'яўляюся старшынёй праўлення Нацбанка, ніякай разавай дэвальвацыі за адзін раз ніколі не будзе», заявіў ён у сакавіку 2011 года.

Пра гэта ж гаварыў і беларускі кіраўнік. Як перад дэвальвацыяй 2009 года, так і напярэдадні абвалу пасля прэзідэнцкіх выбараў Лукашэнка заяўляў, што прычын для боязі няма.

Што тычыцца Надзеі Ермаковай, то заявы пра тое, што ў беларускай эканоміцы ўсё ў парадку, а дэвальвацыі і дэнамінацыі не будзе яна паўтарае практычна на кожнай прэс-канферэнцыі.

Фота: onliner.by