Сноўдэна вылучаюць на Нобелеўскую прэмію міру

Сябра Каралеўскай акадэміі навук Швецыі Стэфан Свалфорс намінаваў Эдварда Сноўдэна на Нобелеўскую прэмію міру.

Збеглага агента ЦРУ ЗША Эдварда Сноўдэна прапануюць намінаваць на Нобелеўскую прэмію міру. Ліст з такім зместам накіраваў у Нарвежскі нобелеўскі камітэт сябра Каралеўскай акадэміі навук Швецыі і прафесар сацыялогіі ўніверсітэта Умео Стэфан Свалфорс, паведамляе НТВ.

Як перадае BBC, Свалфорс у пасланні паказвае, што «гераічныя намаганні Сноўдэна, прынятыя ў шкоду яго асабістаму становішчу, праліваюць святло на тую шырокую шпіёнскую працу, якую вядуць ЗША». Прафесар кажа, што стараннямі маладога агента «свет стаў лепш і бяспечней».

Праўда, у спісы на прэмію 2013 года Нобелеўскі камітэт ужо не паспявае ўключыць Сноўдэна - яны складаліся аж да 1 лютага. Аднак «ён можа быць уключаны ў спіс на 2014-ы год», паведамляе The Daily Mail.

Між тым расейскія СМІ адзначаюць, што Эдвард Сноўдэн, які другі раз папрасіў палітычнага прытулку ў Расеі, усё яшчэ знаходзіцца ў Шарамеццева, у капсульным гатэлі якога і жыве. Крыніца ў аэрапорце распавяла «Інтэрфаксу», што амерыканец зарэзерваваў там пакой. Аднак часам начуе ў спецыяльным пакоі для адпачынку дзяжурнага персаналу ў транзітнай зоне.

У Шарамеццева арганізавалі ахову для Сноўдэна і распрацавалі спецыяльныя меры для забеспячэння бяспекі амерыканскага агента. Аднак крыніца не ўдакладніла, хто менавіта засцерагае былога цэрэушніка - прыватная ахова ці нехта з сілавікоў.

Дарэчы, ніякіх афіцыйных запытаў ад Сноўдэна ў расейскую міграцыйную службу так да гэтага часу і не паступала. Пра гэта ў чарговы раз заявіў кіраўнік ФМС Канстанцін Рамаданаўскі, падкрэсліўшы, што як толькі падобны зварот з'явіцца, ён будзе разгледжаны ва «ўстаноўленым законам парадку».