Пінскі даішнік трапіўся на хабарах, забыўшыся выключыць відэарэгістратар

Інспектар ДАІ браў з кіроўцаў грошы за нескладанне пратаколаў аб адміністрацыйнай адказнасці за парушэнне ПДР.

Брэсцкі міжгарнізонны ваенны суд вынес прысуд былому інспектару ДПС АДАІ Пінскага РАУС. Афіцэра запасу прызналі вінаватым па частках 1 і 2 арт. 430 КК РБ «Атрыманне хабару», ч. 2. арт. 425 «Бяздзейнасць службовай асобы» і па сукупнасці здзейсненых злачынстваў прысудзілі да пяці гадоў пазбаўлення волі з адбываннем пакарання ў папраўчай калоніі ўзмоцненага рэжыму са штрафам 8 000 000 рублёў і канфіскацыяй усёй маёмасці, пазбаўленнем права займаць пасады прадстаўніка ўлады тэрмінам на пяць гадоў з пазбаўленнем спецыяльнага звання «капітан міліцыі», піша «Вечерний Брест».

Зараз у раёне парушальнікаў хуткаснага рэжыму ловяць наступным чынам: у грамадзянскай машыне ўсталёўваюць радар, аўтамабіль прыпаркоўваюць у зоне дзеяння знака «40». Інспектар знаходзіцца ў 5-10 км ад месца парушэння, ён атрымлівае інфармацыю па радыёстанцыі і спыняе парушальнікаў. У той восеньскі дзень капітан дзяжурыў. Ад яго патрабавалася забяспечыць бяспеку падчас чыну асвячэння праезнай часткі. Але на дзяжурства афіцэр выехаў са сваім сябрам. Таварыш з дапамогай прыбора «Візір» фіксаваў парушэнні і па адпрацаванай схеме паведамляў пра іх інспектару.

З інспектарам можна было дамовіцца і абысціся без выканання ўстаноўленых заканадаўствам фармальнасцяў, піша выданне. Кіроўца Mercedes Sprinter, які перавысіў хуткасць на 60 кіламетраў, разлічыўся з капітанам 1 тысячай расейскіх рублёў, кіроўца Citroen, які перавысіў хуткасць на 30 кіламетраў, перадаў афіцэру 25 даляраў. Затрымаць з доказамі злачынства інспектара не ўдалося. Убачыўшы аператыўнікаў, якія падбягалі да машыны, ён паспеў уключыць перадачу і з'ехаць. Праз паўгадзіны сустрэча ўсё ж адбылася, але грошай у машыне не аказалася. Даказаць злачынства ўдалося іншым спосабам: размова ў службовым аўтамабілі аб памеры ўзнагароджанняў зафіксавала ўсталяваная ў салоне машыны відэакамера. Эксперты зрабілі заключэнне, што ў гукавым суправаджэнні відэафайлаў гаворка належыць абвінавачанаму.

Адшукаць хабарадавальнікаў не складала вялікай працы. Нумары машын засталіся ў нататніку добраахвотнага памочніка. На папярэднім следстве і ў судзе кіроўцы Mercedes і Citroen выступілі ў ролі сведак і факт дачы інспектару хабару пацвердзілі. Сваю віну ў атрыманні хабару абвінавачаны не прызнаў. Нескладанне пратаколу патлумачыў тым, што ў яго скончыліся чыстыя бланкі. Аднак у такім выпадку супрацоўнік ДАІ мае права запоўніць пастанову аб прыцягненні асобы да адказнасці. Чыстыя бланкі пастаноў у абвінавачанага меліся.

У справе былога інспектара ДАІ змякчальнай акалічнасцю паслужыла наяўнасць у яго на ўтрыманні двух малалетніх дзяцей. Суд прызнаў афіцэра запасу вінаватым па частках 1 і 2 арт. 430 КК РБ «Атрыманне хабару», ч. 2. арт. 425 «Бяздзейнасць службовай асобы» і прысудзіў яго да 5 гадоў пазбаўлення волі ў папраўчай калоніі ўзмоцненага рэжыму са штрафам 8 мільёнаў рублёў і канфіскацыяй усёй маёмасці, а таксама пазбаўленнем права займаць пасады прадстаўніка ўлады тэрмінам на 5 гадоў з пазбаўленнем спецыяльнага звання «капітан міліцыі». Касацыйная скарга не была задаволеная.