Бітва за Уручча
125- 24.08.2013, 8:13
- 60,104
Набліжаецца развязка аднаго з самых гучных за апошні час гарадскіх канфліктаў.
Супраціўнікі будоўлі на вуліцы Шугаева прадоўжваюць бунтаваць. Яны ўжо выходзілі ў двор на мітынгі, запісвалі відэязвароты да прэзідэнта. Учора ўвечары чыноўнікі склікалі жыхароў раёна на сустрэчу і прасілі іх не замінаць будаўніцтву. Эмоцыі залівалі актавую залю мясцовай гімназіі, алею ў агонь падліў прыход патэнцыйных навасельцаў. Прадказальна, сходка, якая доўжылася блізу двух гадзін, скончылася не адшуканнем кампрамісу, а сваркай, піша onliner.by.
Сутнасць канфлікту нагадаем сцісла. На вуліцы Шугаева быў запланаваны да будаўніцтва 19-павярховы панэльны «слупок». Утварыўся ЖБВК «Першамайскі-1», яго чальцы рабілі ўнёскі, аплачвалі праект. Аднак жыхары мікрараёна выказалі пратэст ўшчыльнення, заявіўшы аб парушэнні шматлікіх нормаў. Пад іх ціскам у мінулым годзе Менгарвыканкам прыняў пастанову дом не будаваць і знайсці для яго іншае месца. Некалькі месяцаў таму гэта пастанова была скасаваная, і атмасфера ў Уруччы-2 зноў напальваецца.
Кіраўнік адміністрацыі Першамайскага раёна Ігар Кудрэвіч, які ўзяў уступнае слова сказаў, што добра знаёмы з праблемамі мікрараёна, абяцаў заняцца іх развязваннем:
«Новыя паркоўкі ў дварах, спартыўныя пляцоўкі - усё гэта ў планах. Але я прасіў бы вас сёння пагадзіцца з будаўніцтвам дома ЖБВК «Першамайскі-1». У адпаведнасці і з праектам дэталёвай планіроўкі, і з будаўнічымі нормамі на сёння ніякіх заканадаўчых падстаў для скасавання будоўлі не існуе».
Немагчымасць расфарміравання кааператыва ці вылучэння ўчастка ў іншым раёне горада Кудрэвіч патлумачыў тым, што чальцы ЖБВК «Першамайскі-1» з 2010 года замовілі за свае грошы распрацоўку праектна-каштарыснай дакументацыі для канкрэтнага зямельнага ўчастка, на што выдаткавалі 300 млн рублёў (каля 1 млрд у цяперашніх цэнах).
«Працэдуры вяртання гэтых сродкаў няма», - развёў рукамі чыноўнік.
«Гэта не камерцыйны праект, а жыллёвы кааператыў. Ёсць такія ж людзі, як і вы, якія заплацілі грошы і запраектавалі жылы дом», - заявіў намеснік старшыні Мінгарвыканкама Андрэй Галь, на што зала адрэагаваў гулам абурэння.
«Пяць дамоў будуюць, а паліклініка адна на ўвесь раён. Лекараў няма. Адкуль жа вам ведаць, вы у нашу паліклініку не ходзіце, - не вытрымала пенсіянерка. - Хто вам даў права пагаршаць умовы пражывання людзей»
«У наш раён у гэтым годзе прыйшлі 52 маладыя спецыялісты з медуніверсытэта. У тым ліку і 8-я паліклініка атрымала лекараў, - адказаў Кудрэвіч. - Праблемы ў Уруччы ўзнікаюць не праз тое, што тут шмат людзей, а таму што разросся мікрараён Усходні, а там сацыяльнай інфраструктуры няма. У наступным годзе пачнецца будаўніцтва паліклінікі ў Усходнім. У гэтым годзе пачатае будаўніцтва двух дзіцячых садкоў: адзін ва Усходнім, другі на тэрыторыі Парку высокіх тэхналогій. Яны возьмуць на сябе 400 дзетак. Сёння ж у дзіцячыя сады Уручча з іншых мікрараёнаў возяць больш за 600 дзяцей».
«Гэтыя садкі вырашылі б толькі сённяшнюю праблему. Вы не ўлічваеце, што ў ПВТ будуюць дзесяць 19-павярховікаў. Што дасць ўсяго адзін дзіцячы садок» - сказала адна з супраціўніц ўшчыльнення.
Жыхары вуліцы Шугаева прасілі чыноўнікаў прыехаць у мікрараён вечарам і паспрабаваць прыпаркаваць машыну. З іх слоў, гэта немагчыма.
Слова ўзяла пажылая жанчына - архітэктар Галіна Горына, якая больш за 40 гадоў працавала ў «Менскпраекце» і ўдзельнічала ў распрацоўцы генеральных планаў Менска. На просьбу жыхароў Уручча яна правяла некаторыя разлікі і прыйшла да высновы, што раён мае патрэбу не ва ўшчыльненні, а ў вызваленні ад забудоў.
«9204 квадратных метраў на гектар, а па нарматыве павінна быць не больш за 9000, - заўважыла архітэктар. - Ніякіх размоў аб новым будаўніцтве быць не можа».
Запрошаны на сустрэчу дырэктар «Менскграда» Леанід Добыш заявіў, што высновы Горынай зроблены на падставе адрывістых дадзеных.
«Ужо 25 разоў усё праверана паводле заканадаўства. Усе экспертызы паўторныя пройдзеныя ў 2012 годзе», - сказаў ён.
Нечакана ў залі пачалі раздавацца галасы ў падтрымку ўшчыльнення. Да мікрафона падышла урач-педыятр 11-й паліклінікі.
«Мяне папрасіла выступіць сяброўка. Яна з ЖБВК «Першамайскі-1», ўнесла 4000 даляраў. У яе ёсць дзіця-інвалід. Людзі, будзьце чалавечнымі, - заклікала дзяўчына. - Праблему перанасялення я ведаю на сваёй шкуры. Людзі ў чэргах у паліклініцы вядуць сябе непрыгожа. Яшчэ не прыйшлі на прыём, а ўжо ідуць скардзіцца. Усе вы хочаце кваліфікаваную медыцынскую дапамогу. А ў гэтым ЖБВК ёсць доктар і медсястра».
Грамадзян у залі гэтыя словы толькі яшчэ горш раззлавалі, але дзяўчына ўсё ж такі дагаварыла:
«Не разумею, пра што можна спрачацца, калі сфарміраваны ЖБВК, людзі заплаці грошы. Трэба было бунтаваць раней, хлопцы».
Да мікрафона выйшлі некалькі прадстаўнікоў ЖБВК. Яны спрабавалі нешта казаць, іх перабівалі, прасілі выйсці з залі. Людзі адбіралі адзін у аднаго мікрафон, хапалі адзін аднаго за локці, спрачаліся, ледзь не крычалі. Апошняя надзея знайсці кампраміс патанула ў балагане. Андрэй Галь заявіў, што вымушаны зачыніць сход, пакуль справа не дайшла да бойкі.
Ці прыслухаюцца ўлады да супраціўнікаў ўшчыльнення? Ці будуць шукаць з імі новых сустрэч ці паступяць, як у мінулым годзе: выведуць на аб'ект будаўнікоў з групай падтрымкі ў выглядзе нарада міліцыі? Развязка канфлікту ў Уруччы блізкая, але пакуль ні адна са старон не хоча саступаць.