На Алтаі знайшлі «Маўглі»
25- 10.09.2013, 19:15
- 49,865
У Алтайскім краі знайшлі 20-гадовага хлопца, які пражыў у лесе 16 гадоў і не ведае цывілізацыі.
Цяпер ён прадаўжае жыць у сваёй зямлянцы і рыхтуецца да сустрэчы зімы, піша агенцтва «РИА Новости» паведамленне пракуратуры Алтайскага краю.
Хлопец здолеў растлумачыць, што, як сказалі яму бацькі, ён нарадзіўся ў 1993 годзе не ў медыцынскай установе каля вёскі Кайтанак, што знаходзіцца ва Усць-Коксінскам раёне Алтайскага краю.
«Ён не атрымліваў адукацыі, сацыяльных навыкаў і не мае ўяўлення аб навакольным свеце па-за лясным масівам. Цяпер хлопец знаходзіцца там жа - у сваёй зямлянцы, і рыхтуецца да зімы, нарыхтоўваючы для абагрэву дровы», - распавёў прадстаўнік пракуратуры краю.
Паводле звестак пракуратуры, бацькі «алтайскага Маўглі» вядуць пустэльны лад жыцця цягам больш як 15 гадоў. Яны з 1997 года да траўня 2013 года жылі недалёка ад селішча Ульянаўка ў зямлянцы. Менавіта ў траўні яны пакінулі сваё звыклае месца, кінуўшы пры гэтым свайго сына ў адзіноце. Прычыны такога ўчынку пакуль застаюцца незразумелымі.
У хлопца няма дакументаў, якія б засведчылі ягоную асобу, таму ён не можа карыстацца усімі гарантаванымі дзяржавай правамі. Пракуратура ўжо звярнулася ў суд для ўстанаўлення факта нараджэння «Маўглі».
«Хлопец зможа сацыялізавацца, калі суд задаволіць наш пазоў, і будуць зробленыя дакументы. Мы ж яму дапаможам», - паведаміў прадстаўнік пракуратуры.