Мітрапаліт Філарэт выпісаўся з лякарні
20- 20.01.2014, 10:51
- 11,092
Ганаровы Патрыяршы экзарх усяе Беларусі мітрапаліт Філарэт выпісаны з лякарні.
«Мітрапаліт Філарэт выпісаны з лякарні. 18 студзеня ён сустрэўся ў Менскім епархіяльным упраўленні з Патрыяршым экзархам усяе Беларусі мітрапалітам Менскім і Слуцкім Паўлам», - паведамілі агенцтву «Інтэрфакс-Захад» у панядзелак у прэс-службе Менскай епархіі.
«Адбылася гутарка двух архіпастыраў, падчас якой мітрапаліт Філарэт павіншаваў уладыку Паўла з Вадохрышчам Гасподнім і пажадаў свайму пераемніку дапамогі Божай у далейшым служэнні на Менскай кафедры. Мітрапаліт Павел выказаў радасць у сувязі з паляпшэннем здароўя ганаровага Патрыяршага экзарха», - праінфармавалі ў прэс-службе.
«19 студзеня, у свята Хрышчэння Гасподняга, мітрапаліт Філарэт здзейсніў у сямейным храме Менскага епархіяльнага ўпраўлення ў гонар Сабора беларускіх святых літургію свяціцеля Васіля Вялікага. Пасля завяршэння літургіі Вялебны ўладыка здзейсніў чын вялікага асвячэння вады, акрапіў вернікаў агіясмай і павіншаваў іх са святам Богаяўлення», - паведамілі ў БПЦ.
Мітрапаліт Філарэт быў шпіталізаваны напярэдадні Калядаў.
Нагадаем, 25 снежня Свяшчэнны сінод пастанавіў задаволіць прашэнне, пададзенае мітрапалітам Менскім і Слуцкім Філарэтам, Патрыяршым Экзархам усяе Беларусі, аб пачысленні яго на спакой. На яго месца быў прызначаны мітрапаліт Разанскі і Міхайлаўскі Павел.