КДК адмовіўся расследаваць парушэнні пры арэндзе Мухаўца

Прадстаўнікі Камітэта дзяржкантролю не сталі разбірацца ў пытанні аб законнасці арэнды часткі ракі Мухавец.

З адпаведным запытам да кантралёраў КДК у жніўні гэтага года звярнулася Берасцейская абласная арганізацыя Беларускай сацыял-дэмакратычнай партыі (Грамада). Актывісты партыі прасілі КДК даць прававую ацэнку дзеянням Берасцейскага райвыканкама, які перадаў прыватнаму прадпрыемству «Белэлектрабудмантаж» у арэнду на пяць гадоў дзесяць кіламетраў ракі, піша сайт ПЦ «Вясна».

Як паведаміў лідар берасцейскіх сацыял-дэмакратаў Ігар Маслоўскі, з адказу КДК вынікае, што запыт перапраўлены ў Берасцейскі аблвыканкам. Арандаваны ўчастак доўжыцца ад мяжы Берасця да Жабінкаўскага раёна.

Але, адзначыў Маслоўскі, свае подпісы ў рамках грамадскай кампаніі «Вернем Мухавец народу!» паставілі больш за тысячу чалавек. Працэс збору подпісаў працягваецца. Далучыцца да кампаніі можна праз адпаведную спасылку на электронны варыянт звароту ў інтэрнэце. Акрамя таго, падпісацца пад зваротам можна ў рыбалоўных крамах Берасця. Сабраныя подпісы пасля будуць адпраўленыя ва ўрад.

Арганізатары кампаніі «Вернем Мухавец народу!» заклікаюць улады адмяніць пастанову Берасцейскага райвыканкама аб перадачы ўчастка ракі ў арэнду.

«Прыродазнаўчыя прыродныя водныя аб'екты з'яўляюцца ўласнасцю народа і не могуць быць прадметам арэнды з мэтай прамысловай лоўлі рыбы без уліку меркавання жыхароў рэгіёну, - заявіў ён. - Ніхто з прадстаўнікоў улады гэтае пытанне з людзьмі не ўзгадняў, не было ніякіх грамадскіх слуханняў або абмеркавання ў СМІ. У народзе гэта называюць «узаконеным браканьерствам».

Акрамя таго, падкрэсліваюць ініцыятары кампаніі, прамысловая лоўля ставіць пад пагрозу знішчэнне ўнікальных відаў рыб, якія водзяцца ў Мухаўцы.