ЕЗ гатовы выдзеліць 300 мільёнаў на газаправод з Польшчы ў Літву

Кошт усяго праекта складае 558 млн еўра.

Еўрапейскі Звяз можа вылучыць больш за 300 млн еўра на будаўніцтва новага газаправода з Польшчы ў Літву з мэтай павышэння энэргетычнай бяспекі еўрапейскай супольнасці, паведаміла прэс-служба польскай кампаніі Gaz System. Польская кампанія паведаміла, што канчатковая пастанова аб дафінансаванні будаўніцтва гэтага газаправода яшчэ не прынятая, адзначыўшы, што кошт усяго праекта складае 558 млн еўра.

Gaz System таксама паведаміў, што ў лік праектаў, якія могуць атрымаць фінансаванне ЕЗ, увайшлі таксама падрыхтоўка праектнай дакументацыі на будаўніцтва газаправодаў паміж Польшчай і Чэхіяй і Польшчай і Славакіяй: на суму 1,5 млн еўра і 4,6 млн еўра адпаведна.

Раней намеснік кіраўніка НАК Нафтагаз Украіны Аляксандр Тадыйчук заявіў, што Украіна пасля запланаванага будаўніцтва новага газаправода ў Польшчу зможа атрымліваць газ не толькі з гэтай краіны, але ў перспектыве таксама з Літвы, якая з 2015 года пачне імпартаваць звадкаваны газ.

Таксама кіраўнік урада Украіны Арсеній Яцанюк даручыў правесці тэрміновыя перамовы з Еўрапейскім банкам рэканструкцыі і развіцця на тэму будаўніцтва новага газаправода з Польшчай, які, з ягоных звестак, дазволіў бы штодзённа перапампоўваць з Еўропы ў Украіну 80 млн кубаметраў газу. Яцанюк заявіў, што такі газаправод дазволіць Кіеву закупляць усё неабходнае паліва на еўрапейскім рынку.