«Траўматычны атракцыён» у менскім аквапарку мадэрнізуюць

У менскім аквапарку «Лебядзіны» заменяць цюбінгі для горкі, падчас катання на якой атрымалі траўмы двое наведвальнікаў.

Пра гэта паведамілі ў прэс-службе комплексу, паведамляе БелТА.

«Пасля таго, як двое наведвальнікаў аквапарку атрымалі пераломы, у комплексе была праведзена праверка пад кіраўніцтвам Дзяржпрамнагляду. Канструкцыі горкі таксама яшчэ раз вывучылі спецыялісты нямецкай кампаніі, якая з'яўляецца пастаўшчыком абсталявання. Паводле вынікаў праверкі недахопаў у канструкцыях не выяўлена. Разам з тым адміністрацыя забаўляльнага комплексу пастанавіла замяніць цюбінгі для горкі «Ратлер» на больш глыбокія і з больш масіўнымі поручнямі па баках», - распавялі ў прэс-службе.

У службе паводле сувязяў з грамадскасцю адзначылі, што ўсе трынаццаць горак аквапарку раніцай кожнага дня правяраюцца спецыялістамі нямецкай кампаніі, якая іх абслугоўвае, а ўсе наведвальнікі комплексу, перш чым скаціцца з горкі, атрымліваюць кансультацыю інструктара. Штодня ў закрытай зоне аквапарку працуюць 24 інструктары і дзяжураць не менш за трое медыкаў.

Са слоў спецыялістаў, каб пазбегнуць траўм, людзям неабходна выконваць элементарныя правілы паводзін у час адпачынку на водных атракцыёнах.

Аквапарк «Лебядзіны», які лічыцца адным з найбуйнейшых у краінах СНД і пятым па велічыні ў Еўропе, адкрыўся для наведвальнікаў 11 траўня 2014 года. За гэты час на водных атракцыёнах пакаталіся больш за 13 тысяч чалавек.