Беларускім чыноўнікам забаранілі адпачываць ва Украіне?
28- 22.07.2014, 15:14
- 46,615
Супрацоўнікам дзяржапарату Беларусі забаранілі бавіць адпачынак у суседняй краіне.
Пра гэта на сваёй старонцы ў «Фэйсбуку» паведаміў гарадзенскі журналіст Андрэй Мялешка.
«Сёння беларускім дзяржаўным службоўцам забаранілі ездзіць ва Украіну на адпачынак. Нейкі дзіўны загад. Цяпер мае родзічы паедуць праз Расею», - напісаў ён.
Карэспандэнт нашага сайта звярнуўся ў некалькі дзяржаўных органаў па дадатковую інфармацыю. Крыніца charter97.org ў Дзяржаўным мытным камітэце Беларусі адзначыла, што «пакуль на гэты конт нічога не чуў». А вось у Гарадзенскім гарвыканкаме на пытанне, ці могуць яго супрацоўнікі ехаць на адпачынак ва Украіну, адказваць адмовіліся.
«Добрае пытанне... Вы ведаеце, я на яго нават не адкажу, бо... Цікавае пытанне, так...», - сказалі там.
Ва ўправе ідэалагічнай работы Гарадзенскага абласнога камітэта заявілі, што «не маюць уяўлення аб гэтым».
Адзначым, раней наш сайт паведамляў пра абмежаванне на выезд за мяжу для мытнікаў.