13 красавiка 2024, Субота, 12:20
Падтрымайце
сайт
Сім сім,
Хартыя 97!
Рубрыкі

Палітвязня Статкевіча чакае новы суд

60
Палітвязня Статкевіча чакае новы суд

Мікалаю Статкевічу пагражае ўзмацненне жорсткасці рэжыму.

Пра гэта напісала позна ўвечары 13 красавіка на сваёй старонцы ў сацыяльнай сетцы «Фэйсбук» жонка палітвязня і былога кандыдата ў прэзідэнты Беларусі Марына Адамовіч.

«Мікалая Статкевіча чакае новы суд. Адміністрацыя калоніі наважыла, што ён настолькі «не стаў на шлях выпраўлення», і «мае намер весці злачынны лад жыцця», што ягонае далейшае ўтрыманне ў гэтай высокамаральнай установе немагчымае», - паведаміла яна.

9 красавіка камісія папраўчай калоніі №17 Шклова, дзе ўтрымліваецца Мікалай Статкевіч, «прыняла пастанову адправіць яго на турэмны рэжым да канца тэрміну». «Калі суд, мне невядома. Якія-небудзь падрабязнасці таксама. Ведаю адно, што на сёння ў яго 13 спагнанняў, з якіх 10 - за адмову ад працы», - піша Марына Адамовіч.

Цяпер, паводле яе звестак, Мікалай Статкевіч утрымліваецца ў памяшканні камернага тыпу, дзе няма дзённага святла, а на шпацыр адводзіцца паўгадзіны ў дзень.

Пра тое, што адміністрацыя калоніі ўзмацніла ціск на апазіцыйнага палітыка, стала вядома ў пачатку красавіка, калі толькі за адзін тыдзень на яго склалі восем актаў нібыта за парушэнне рэжыму. Палітвязень быў пазбаўлены кароткатэрміновага спаткання, якое ў іх планавалася ў гэтым месяцы і прадуктовай перадачы, правёў трое сутак у штрафным ізалятары, а 3 красавіка яго перавялі на два месяцы ў памяшканне камернага тыпу (ПКТ).

Мікалай Статкевіч - адзіны кандыдат у прэзідэнты Беларусі на выбарах 2010 года, які да гэтага часу знаходзіцца ў зняволенні. У траўні 2011-га ён быў прысуджаны да шасці гадоў пазбаўлення волі паводле абвінавачвання ў арганізацыі масавых беспарадкаў у дзень прэзідэнцкіх выбараў. Міжнародныя праваабарончыя арганізацыі прызналі Статкевіча палітычным зняволеным.

Першапачаткова асуджаны палітык адбываў пакаранне ў шклоўскай калоніі №17, аднак у студзені 2012-га яму зрабілі больш жорсткімі ўмовы і перавялі ў магілёўскую турму №4 на тры гады. Пасля сканчэння гэтага тэрміну, 12 студзеня гэтага года, Статкевіча вярнулі ў шклоўскую калонію, дзе ў першыя ж два дні ў дачыненні да палітыка склалі два рапарты аб парушэнні правілаў унутранага распарадку.

Напісаць каментар 60

Таксама сачыце за акаўнтамі Charter97.org у сацыяльных сетках