Падаткавікі абяцаюць не праводзіць масавых праверак прадпрымальнікаў

Міністэрства падаткаў і збораў і Дзяржаўны камітэт стандартызацыі не плануюць масавых праверак індывідуальных прадпрымальнікаў.

Аб гэтым па выніках нарады аб праблемных пытаннях прадпрымальнікаў, якое прайшло 14 студзеня, паведамляюць «Беларускія навіны» са спасылкай на прэс-службу Міністэрства эканомікі.

Са слоў намесніка старшыні Дзяржстандарту Сяргея Іўлева, абласныя інспекцыі Дзяржстандарту не планавалі на першае паўгоддзе 2016 правядзенне праверак адпаведнасці прадукцыі лёгкай прамысловасці патрабаванням адпаведнага тэхрэгламенту Мытнага саюза ў ІП.

На нарадзе, акрамя таго, абмяркоўвалася пытанне аб неабходнасці памяншэння адміністрацыйнай адказнасці ІП за парушэнне тэхрэгламентаў. «Дзяржстандартаму цяперашні час падрыхтаваны прапановы для зніжэння сумы штрафных санкцый да індывідуальных прадпрымальнікаў за парушэнні ў галіне санітарна-эпідэміялагічных патрабаванняў і патрабаванняў тэхнічных нарматыўных прававых актаў. Праект змен накіраваны на ўзгадненне з зацікаўленымі», - паведамляе прэс-служба.

Гаворка ідзе пра нормы ўказа №48 «Аб мерах забеспячэння дзяржаўнага кантролю (нагляду) за выкананнем патрабаванняў тэхнічных рэгламентаў».

Намеснік міністра падаткаў і збораў Уладзімір Муквіч на сустрэчы таксама заявіў, што «ніякіх масавых праверак выканання норм указа №222 не плануецца, аднак падкрэсліў, што гаворка не ідзе пра мараторый».

У паведамленні прэс-службы адзначаецца, што ў чальцоў Беларускага звязу прадпрымальнікаў і Менскага сталічнага звязу прадпрымальнікаў і працадаўцаў пераважна няма праблем з выкананнем указа №222 і яны працягваюць гандляваць прадукцыяй з неабходнымі дакументамі.

«У той жа час на нарадзе было адзначана, што сярод прадпрымальнікаў, якія прыпынілі сваю працу, вялікая колькасць чальцоў грамадскага аб'яднання «Перспектыва», магчыма, з прычыны таго, што гэты бізнэс-звяз стала выказваў сваю нязгоду з нормамі ўказа №222 і накіроўвае сваіх чальцоў не на яго выкананне, а на чаканне яго скасавання», - мяркуюць у Мінэканомікі.

Нагадаем, што з 1 студзеня 2016 года беларускія ІП масава спынілі гандаль. З гэтай даты, згодна з указам Лукашэнкі, прадпрымальнікі не змогуць прадаваць тавары лёгкай прамысловасці, увезеныя з краін Мытнага саюза, без сертыфікатаў. Да 1 студзеня 2016 года ім надавалася права рэалізаваць рэшткі тавараў, увезеных да 1 ліпеня 2014 года ў Беларусь без суправаджальных дакументаў, паводле зарэгістраваных у падатковых органах вопісах рэшткаў.

500 прадпрымальнікаў рынку ў Полацку апоўдні 16 кастрычнік пачалі страйкаваць на знак пратэсту супраць масавых праверак, якія праводзяць супрацоўнікі падатковай інспекцыі і АБЭЗ. Сустрэча з адміністрацыяй не прынесла вынікаў. У раённай падатковай інспекцыі прадпрымальнікаў папярэдзілі пра тое, што праверкі прадоўжацца. Полацкія ІП не выключаюць новых акцый пратэсту.

З пачатку студзеня 2016 года на пустых рынках і ў гандлёвых цэнтрах Беларусі праходзяць стыхійныя мітынгі прадпрымальнікаў.

Антыкрызісны форум прадпрымальнікаў, які праходзіў 11 студзеня ў менскім гатэлі «Беларусь», сабраў амаль паўтары тысячы прадстаўнікоў малога бізнэсу. На форум з'ехаліся прадпрымальнікі з Менска, Гомеля, Брэста, Віцебска, Магілёва, Барысава, Жлобіна, Слуцка, Полацка, Наваполацка, Оршы, Слоніма, Маладзечна, Быхава, Бабруйска, Светлагорска, Асіповічаў, Мазыра, Добруша, Ліды, Чэрвеня, Заслаўя, Ваўкавыска.

Арганізатарам форуму выступіла рэспубліканскае грамадскае аб'яднанне «Перспектыва».

Арганізатары форуму распарадзіліся вывесці з залы прадпрымальніка і грамадскага актывіста Аляксандра Макаева за заклік да мітынгу.

Лідар беларускай апазіцыі Мікалай Статкевіч прапанаваў прадпрымальнікам план легальнай акцыі пратэсту ля адміністрацыі Лукашэнкі.