Папа Рымскі абвясціў сем новых святых

Да ліку святых пантыфік прылічыў святароў і свецкіх з шасці краін.

Папа Рымскі Францішак здзейсніў у нядзелю, 16 кастрычніка, абрад кананізацыі, абвясціўшы святымі каталіцкай царквы сем блаславёных - двух пакутнікаў, трох заснавальнікаў манаскіх ордэнаў, аднаго простага святара і адну манашку. Цырымонія адбылася на плошчы перад саборам святога Пятра ў Ватыкане, паведамляе DW.com.

Святымі сталі француз Саламон Леклерк (1745 - 1792) і мексіканец Хасэ Санчэс Дэль-Рыа (1913 - 1928), якія былі ахвярамі рэвалюцый у сваіх краінах.

Сярод трох заснавальнікаў манаскіх ордэнаў найбольш вядомым з'яўляецца італіец Людовіка Павоні (1784 - 1849), які заснаваў у 1847 годзе «Кангрэгацыю сыноў Марыі Имакулаты» - манаскі ордэн, які дапамагаў бедным і беспрацоўным маладым людзям.

Абвешчаны святым італьянец Альфонса Марыко Фуско (1839-1910) заснаваў жаночы манаскі ордэн, які дапамагаў бедным сялянам. Гішпанскі біскуп Мануэль Гансалес Гарсія (1877 - 1940) заснаваў дзве манаскія кангрэгацыі.

Да ліку святых пантыфік прылічыў таксама простага аргентынскага святара Хасэ Габрыэля дэль Расарыё Брачэра (1840 - 1914), які прысвяціў жыццё дапамогі бедным і хворым, і французскую манашку Элізабэт дэ ла Трынітэ (1880 - 1906).

Абвяшчэнне святым у каталіцтве з'яўляецца другой стадыяй праслаўлення, якая ідзе пасля беатыфікацыі (прылічэння да ліку блаславёных).

У асобнай заяве 13 кастрычніка Ватыкан паведаміў, што Кангрэгацыя кананізацыі святых з ухвалення Папы Францішка выдала дэкрэты, якія сведчаць аб «гераічных цнотах» чатырох чалавек, якія цяпер атрымаюць права на беатыфікацыю, калі які-небудзь цуд будзе прыпісаны да іх заступніцтва. Гэта два гішпанскія святары, а таксама манах і манашка з Італіі.