У Менску судзілі збітага супрацоўнікамі АМАП падлетка
88- 31.10.2016, 11:41
- 27,462
Пракурор запатрабавала для Аляксандра Харуты два гады «хатняй хіміі».
У судзе Цэнтральнага раёну Менску пачаўся разгляд справы 17-гадовага Аляксандра Харуты, збітага і абражанага міліцыянтамі, якога яны ж і абвінавацілі ў гвалце.
Аляксандра абвінавачваюць паводле артыкула 364 Крымінальнага кодэкса Рэспублікі Беларусь «Гвалт або пагроза гвалту ў дачыненні да супрацоўніка органаў унутраных спраў», паведамляе «Радыё Свабода».
Справа разглядаецца пад старшынствам суддзі Валерыя Есьмана.
Інцыдэнт адбыўся ў ліпені 2016 года. Абвінавачаны Аляксандр Харута растлумачыў, што разам з сябрам адпачываў у раёне Драздоў. У мінакоў папрасілі купіць ім бутэльку гарэлкі. Распілі на дваіх 300 гр, астатняе выкінулі. Кампанія, якая праходзіла побач, папярэдзіла, што наперадзе дзяжурыць АМАП. Харута і ягоны таварыш наважылі сысці.
Са словаў абвінавачанага, іх паклікаў супрацоўнік міліцыі. Падлеткі спалохаліся і наважылі ўцячы.
«Я павярнуўся і ўбачыў, як мужчына ў цывільным наносіць удары кулаком па галаве сябра, - растлумачыў Аляксандр. - Я кінуўся да яго. Ён ляжаў на зямлі, пад правым вокам у яго быў сіняк. Пад'ехаў аўтазак, нас папрасілі туды зайсці. Усярэдзіне былі яшчэ тры падлетка і яшчэ два супрацоўнікі АМАП».
Прычыну затрымання Аляксандру і ягонаму таварышу не патлумачылі. У аўтазаку, са словаў абвінавачанага, яму стала дрэнна. Было горача, падзейнічаў алкаголь.
«Я ўстаў, каб сказаць ім, што мне дрэнна. Яны стаялі насупраць мяне, пра штосьці размаўлялі, - заявіў Харута. - Машына павярнула, і я выпадкова ўпаў. Шукаў апору і атрымліваецца, рукой трапіў па вуснах пацярпелага. Але я не хацеў яго біць».
Пасля гэтага, са словаў падсуднага, супрацоўнікі АМАП павалілі іх на зямлю і пачалі збіваць.
Паводле версіі абвінавачвання, Аляксандр Харута наўмысна нанёс удар супрацоўніку АМАП Алегу Шарко. Экспэртыза зафіксавала лёгкія цялесныя пашкоджанні. У судзе стала вядома, што на гэты момант Шарко ўжо не з'яўляецца супрацоўнікам міліцыі. Цяпер ён нідзе не працуе.
Раней праваабаронцы са спасылкай на родных паведамлялі, што супрацоўнікі міліцыі не проста збілі падлеткаў, а таксама пагражалі сэксуальным гвалтам.
Абвінавачаны Харута мяркуе, што пацярпелы Шарко яго агаворвае. «Я адразу пачаў на іх заяву пісаць у РАУС», - заявіў падсудны.
У Следчым камітэце адмовілі ў распачынанні крымінальнай справы аб факце збіцця падлеткаў. Аднак адвакат Харуты накіраваў скаргу, цяпер заяву разглядае пракуратура.
Падлетку выстаўленае абвінавачванне паводле арт.364 КК (гвалт альбо пагроза ўжывання гвалту ў дачыненні да супрацоўніка органаў унутраных спраў). Калі ягоная віна будзе даведзеная, яму пагражае да шасці гадоў пазбаўлення волі.
Сведкамі з боку «пацярпелага» выступілі два супрацоўнікі АМАПу - камандзір аддзялення Алег Жук і ягоны калега Андрэй Антановіч. Абодва яны заявілі, што падлетак ударыў АМАПаўца Шарко, а той падлетка нібыта не біў.
Маці падлетка Ірына Махнач павінна была выступіць на судзе з паказаннямі як ягоная законная прадстаўніца, але не змагла стрымаць слёз. Жанчыне стала дрэнная, яна была вымушаная пакінуць залу суда і прыняць лекі.
Пракурор папрасіла для Аляксандра Харуты два гады абмежавання волі без накіравання ў месцы пазбаўлення волі - так званай «хатняй хіміі».
У сваім апошнім слове падлетак сказаў скрозь слёзы: «Я прызнаю, што недапушчальна знаходзіцца ў стане алкагольнага ап'янення ў грамадскім месцы».
Судовае паседжанне скончылася. Прысуд будзе абвешчаны заўтра а 10.00.
Пасля пасяджэння суда маці Аляксандра заявіла журналістам: «Сын - спакойны, добры хлопчык, я заўсёды атрымлівала падзякі і граматы ў школе ад настаўнікаў. Я не ўяўляю, як такое магло адбыцца».