У Менск сталі лётаць «Іракскія авіялініі»
5- 21.01.2017, 10:19
- 7,507
Паветраныя зносіны паміж Беларуссю і Іракам адкрыла дзяржаўная кампанія «Іракскія авіялініі».
Інфармацыя размешчаная на сайце Нацыянальнага аэрапорта Менск.
«Урачыстае адкрыццё новых рэгулярных паветраных зносінаў паміж Іракам (Багдад, Басра) і Беларуссю (Менск) адбылося 20 студзеня. Раніцай у 10.40 паводле менскага часу ў беларускай сталіцы ажыццявіў пасадку лайнер, на борце якога знаходзіліся высокія госці з Ірака», – апавялі ў аэрапорце.
У складзе іракскай дэлегацыі ў беларускую сталіцу прыляцелі міністр транспарту Ірака Хусэйн Аль-Хаваджы, генеральны дырэктар авіякампаніі Абед Кубах, чалец парламента Абдулрыдха Аль-Тамеемі і іншыя афіцыйныя асобы.
«Іракская дэлегацыя прыбыла вельмі салідным складам. У яе ўвайшлі не толькі чыноўнікі самага высокага рангу, але і шматлікі журналісцкі корпус: прадстаўнікі галоўных іракскіх тэле- і радыёканалаў», – растлумачылі спецыялісты.
У Нацыянальным аэрапорце гасцей сустракалі першы намеснік міністра транспарту і камунікацый Беларусі Аляксей Аўраменка, намеснік дырэктара Дэпартамента авіяцыі Міністэрства транспарту і камунікацый Беларусі Ірына Марозава, кансультант аддзела перавозак, сертыфікацыі, рэгістрацыі і знешнеэканамічнай сувязі Дэпартамента авіяцыі Святлана Каленік, прадстаўнікі кіраўніцтва аэрапорта.
«У зале афіцыйных асобаў і дэлегацый аэрапорта прайшлі першыя двухбаковыя перамовы, прысвечаныя будучаму супрацоўніцтву паміж нашымі краінамі.
Каментуючы сустрэчу, намеснік дырэктара Дэпартамента авіяцыі Міністэрства транспарту і камунікацый Беларусі Ірына Марозава адзначыла, што Ірак – найстаражытнейшая дзяржава з багатай і цікавай гісторыяй, з дастапомнасцямі якой беларусам цяпер будзе лягчэй пазнаёміцца. Развіццё турыстычнага патэнцыялу паміж нашымі дзяржавамі стала зручнейшым і больш даступным», – падкрэслілі ў аэрапорце.
У сезонным раскладзе на сайце Нацыянальнага аэрапорта Менск паказана, што рэйс IA-272/271 іракскіх авіяліній будзе курсіраваць з Багдада ў Менск і назад у пятніцы цягам месяца, да 20 лютага. Час прылёту ў сталіцу Беларусі – 10.40 раніцы, а вылету назад у Багдад – 15.00.