Святлана Алексіевіч ахвяравала $5 тысяч на музей Алеся Адамовіча

Пісьменніца назвала Алеся Адамовіча «беларускім Гаўлам» і паабяцала далейшы ўдзел у справе стварэння музея.

Пісьменніца Святлана Алексіевіч пералічыла абяцаныя ёю 5 тысяч даляраў на стварэнне музея Алеся Адамовіча ў пасёлку Глуша Бабруйскага раёна Магілёўскай вобласці.

Аб пералічэнні грошай «Радыё Свабода» паведаміла ініцыятарка збору сродкаў на стварэнне музея - журналістка газеты «Звязда» Нэлі Зігуля.

Са слоў Зігулі, у найбліжэйшы час павінен прайсці тэндэр на стварэнне праектна-каштарыснай дакументацыі для рэстаўрацыі будынка ў вёсцы Глуша Бабруйскага раёна, дзе плануецца стварыць музей.

Як заяўляў на круглым стале прадстаўнік магілёўскага Цэнтра рэстаўрацыі Марат Абдулін, на выраб праектна-каштарыснай дакументацыі неабходна блізу 12 тысяч рублёў. Цяпер, на сцвярджэнне Нэлі Зігулі, сабрана больш за 11,5 тысяч рублёў.

5 лістапада ў Магілёве падчас круглага стала было заяўлена, што Нобелеўская лаўрэатка Святлана Алексіевіч гатовая ахвяраваць на стварэнне музея Алеся Адамовіча ў Глушы 5 тысяч даляраў.

«Алесь Адамовіч - беларускі Вацлаў Гавэл. Ягонае імя трэба ўвекавечыць. Ідэю стварэння музея я падтрымліваю і буду ў гэтай справе ўдзельнічаць», - адзначыла тады Святлана Алексіевіч.