Многія беларусы могуць застацца без пенсій

Стала вядома пра яшчэ адну «пенсійную пастку».

Высветлілася, што ў прадпрыемстваў не заўсёды ёсць патрэбныя дакументы, а яны неабходныя цяпер для налічэння пенсіі, піша kp.by.

На круглым стале ў пастаяннай камісіі «парламента» аб працы і сацыяльных пытаннях некалькі «дэпутатаў» звярнуліся да прадстаўнікоў Мінпрацы з пытаннямі пра тое, як пры прызначэнні пенсій улічваецца савецкі стаж.

Высветлілася, што многія беларусы сутыкнуліся з праблемай: у часы СССР яны працавалі ў Расеі ці ва Украіне, а цяпер не могуць гэта даказаць, таму што дакументаў у тых прадпрыемстваў не захавалася.

– Калі няма дакументаў пра зарплату ў прадпрыемства, грамадзянін мае права звярнуцца ў суд паводле месца жыхарства, паказаўшы, якую заработную плату ён атрымліваў. Ён не судзіцца з тым, хто не захаваў дакументы. Ён звяртаецца ў суд для высвятлення факта, які мае юрыдычнае значэнне. Тут няма позыўнага патрабавання ні да каго, гэта прынцыпова, – падкрэсліў Валерый Кавалькоў. – Чалавек звяртаецца ў суд паводле месца жыхарства і кажа: я працаваў там і там, атрымліваў заработную плату такога памеру, у мяне ёсць камсамольскі білет, у якім пазначаны гэтыя сумы, прафсаюзны білет, білет чальца КПСС або любы іншы дакумент. Аж да таго, што, калі гэта савецкі перыяд, суд мае права запытаць інфармацыю наконт зарплаты на аналагічным прадпрыемстве.

– А калі ў чалавека таксама не засталося ніякіх дакументаў? – пацікавіліся дэпутаты.

– Суд можа разгледзець і без дакументаў. Апытанне сведак, вывучэнне ўскосных дакументаў – у суда правоў значна больш. А пастанова суду абавязковая для выканання.

Такім чынам, замест выдання закона, які цалкам залічваў бы беларусам працоўны стаж падчас СССР, улады чарговы раз пераклалі праблему на грамадзянаў, прапанаваўшы ім самім займацца судовым валаводжаннем з сумнеўным вынікам.

Нагадаем, што да 2014 года страхавы стаж, які ўлічваецца пры вызначэнні права на працоўную пенсію, складаў 5 гадоў. А з 1 студзеня 2014 года яго павялічылі да 10 гадоў, праз год – да 15 гадоў. У 2015 годзе ён ужо складаў 15 гадоў і 6 месяцаў. З пачатку гэтага года страхавы стаж паднялі яшчэ на паўгода, цяпер ён складае 16 гадоў. Штогод гэтая планка будзе павялічвацца на 6 месяцаў – да 20 гадоў.

Цяпер беларусы, якія не выпрацавалі страхавы стаж, трапляюць у «пенсійную пастку»: яны не могуць прэтэндаваць на працоўную пенсію, ім могуць толькі прызначыць сацыяльную.

Падчас таго ж выступу перад «палатачнікамі» прадстаўнік Мінпрацы Валерый Кавалькоў заявіў, што ўлады маюць намер захаваць «пенсійную пастку» для ІП і ўсіх, хто працуе на сябе.