У школах дзяцей-ільготнікаў садзяць у сталовай за асобнымі сталамі і не даюць прысмакі

Бацькі дзяцей абураныя.

У той час, як Лукашэнка выступае за тое, каб «дзеці былі аднолькавыя», у баранавіцкіх школах дзяцей-ільготнікаў садзяць у сталовай за асобнымі сталамі. Бацькі абураныя такім дзяленнем і ўважаюць яго за зневажальнае.

- Мая дачка вучыцца ў другім класе і ў школе харчуецца толькі на датацыю, якую выдае дзяржава. Нядаўна дачка спытала ў мяне, чаму ў сталовай яна сядзіць за асобным сталом і не можа сядзець з сяброўкай, і чаму ёй не даюць прысмакі - сырок або сок, як іншым дзецям, - звярнулася ў Intex-press шматдзетная мама Наталля.

Са слоў гараджанкі, яна гатовая даплачваць за харчаванне, толькі каб яе дзіця атрымлівала звычайную порцыю і сядзеў разам з усімі. Але на бацькоўскім сходзе, са слоў Наталлі, настаўніца пра гэта не згадвала, а сама яна нават уявіць не магла, што дзяцей будуць «дзяліць па сталах».

- Чаму дзіця садзяць за асобны стол? Гэта зневажальна. Я не хачу, каб яно адчувала сябе выгнанцам і лавіла касыя погляды і насмешкі аднакласнікаў, - абураецца жанчына.

Гараджанка Святлана, якая выхоўвае чацвярых дзяцей, таксама незадаволеная, што «ільготнікаў» кормяць асобна ад іншых навучэнцаў. Са слоў Святланы, у школе бацькам прапаноўваюць укласці дадатковую суму, але не ўсе могуць штомесяц выдаткаваць з сямейнага бюджэту 8-9 рублёў.

- Хіба дзеці вінаватыя ў тым, што заробку бацькоў не стае на даплаты? Як растлумачыць дзіцяці, якое вучыцца ў пачатковай школе, чаму яго садзяць асобна і не даюць сырок ці яблык? Усе павінны карміцца аднолькава. Але выраўняць кошт порцый для «ільготнікаў» і тых, чые бацькі даплачваюць, можна і ў меншы бок. Корміце ўсіх навучэнцаў на датацыю, - мяркуе Святлана.

Адны - пераканаўча просяць, іншыя - не паведамляюць

З 1 верасня ў старшакласнікаў кошт порцый выраўнялі. І зрабілі гэта, як адзначыў у жніўні на пасяджэнні гарвыканкама Андрэй Дзяркач, дырэктар ААТ «Агульнахарч «Школьнік», для таго, каб не было розніцы паміж порцыямі тых дзяцей, якія сілкуюцца за датацыі, і тых, хто сілкуецца за кошт бацькоўскіх сродкаў.

Для малодшых школьнікаў розніца ў кошце харчавання захавалася. Порцыя каштуе 1 рубель 83 капейкі на дзень. Датацыі, якую выдзяляе дзяржава, складае 1 рубель 43 капейкі. У выніку абед дзяцей, чые бацькі даплачваюць 40 капеек за дзень (8-9 рублёў за месяц), адрозніваецца - яны дадаткова атрымліваюць сырок, сок ці нейкую садавіну.

Абтэлефанаваўшы гарадскія школы, журналісты высветлілі, што ў розных навучальных установах да пытання харчавання «ільготнікаў» падыходзяць па-рознаму. У адных школах ўсіх бацькоў пераканаўча просяць даплачваць 40 капеек за абед.

- Маленькія дзеці перажываюць праз усялякія адрозненні, таму мы спрабуем зрабіць усё, каб дзеці хоць бы сілкаваліся аднолькава. І пераконваем у гэтым бацькоў, - кажуць у адміністрацыі адной з баранавіцкіх школ.

Праўда, бацькі, якія адмаўляюцца даплачваць, усё адно ёсць.

- Першы час за порцыі дзяцей даплачвае настаўнік у надзеі на тое, што бацькі потым унясуць патрэбную суму. Але калі гэтага не адбываецца, то нічога зрабіць нельга: настаўнік таксама не можа ўвесь час плаціць са свайго заробку, - адзначае намеснік дырэктара адной з навучальных устаноў.

У іншых школах пра магчымасць даплаты не паведамляюць, але, калі бацькі звернуцца з такой просьбай, адмовіць ім, як адзначылі ў адной са школ, не змогуць.

У кожным выпадку, дзяцей, чые бацькі не ўносяць 40 капеек, садзяць у сталовай за асобныя сталы.

- Гэта робіцца не для таго, каб неяк вылучыць гэтых дзяцей. Работнікі сталовай павінны падаць порцыі сотні школьнікаў і, каб не збіцца і нічога не пераблытаць, «ільготнікам» падаюць на асобных сталах. Можна пасадзіць за адзін стол, але як потым растлумачыць дзіцяці, чаму яму нельга ёсці апельсін, які там ляжыць, - тлумачаць у адной з гарадскіх школ.