БГК у адзін дзень правядзе два афіцыйныя матчы ў розных частках Еўропы

Будзе ўнікальная падзея для беларускага гандбола.

БГК ім. Мяшкова згуляе з двума спаборнікамі ў адзін і той жа дзень адразу ў двух розных гарадах. Сеанс адначасовай гульні прызначаны на 18 кастрычніка: у сербскім Нові-Садзе мяшкоўцы сутыкнуцца з «Вайводзінай» у рамках SEHA-лігі, а ў беларускім Гомелі - з тамтэйшай аднайменнай камандай ужо ў рамках роднага нацыянальнага чэмпіянату. Матчы пачынаюцца з інтэрвалам у гадзіну. А 18.00 і а 19.00 адпаведна.

Такім чынам, у рамках 6 тура SEHA-лігі на арэне «Слана-Бара» БГК пазмагаецца з «Вайводзінай». У балканскі ваяж мяшкоўцы адправіліся сёння раніцай пад кіраўніцтвам Андрэя Мачалава і Паўла Башкіна, - інфармуе афіцыйны сайт БГК. У выязным «сербскім спісе» 15 гульцоў:

Брамнікі: Уладзімір Корсак, Іван Мацкевіч, Радэ Міятавіч.

Крайнія: Ягор Будзейка, Максім Мачалаў, Райка Проданавіч, Люба Вукіч.

Лінейныя: Від Патэка, Вячаслаў Шумак, Ростка Стойкавіч.

Паўсярэднія: Петар Джорджыч, Канстанцін Ігропула, Аляксандр Шкурынскі.

Разыгрываюць: Арцём Кулак, Уладзіслаў Наумук.

Ну, а другая частка каманды сёння пасля абеду адправілася ў Гомель. У матчы чэмпіянату Беларусі Сяргей Бябешка і Ігар Рапавец плануюць выкарыстоўваць 15 гандбалістаў:

Брамнікі: Іван Пешыч, Віталь Чарапенька.

Крайнія: Дзяніс Рутэнка, Андрэй Юрынок.

Лінейны: Арцём Сельвесюк.

Паўсярэднія: Андрэй Яшчанка, Павел Горак, Павел Дарафееў, Мікіта Лашчакоў, Данііл Вяргейчык, Алег Астрашапкін, Сяргей Шыловіч.

Разыгрываюць: Дзмітрый Нікуленкаў, Валянцін Куран, Валянцін Сілко.