Відэафакт: Пад Менскам фура з'ехала ў катлаван і загарэлася
2- 2.10.2017, 20:04
- 27,543
Рабочыя паспелі адскочыць, а кіроўцу ўдалося выратаваць.
Сёння днём у раёне трасы М1 (Берасце - Менск - мяжа Расеі) недалёка ад населеных пунктаў Сокал і Волма ў ДТЗ трапіла фура. Як распавёў сведка, грузавік з'ехаў з дарогі, прабіў агароджу і абрынуўся ў катлаван.
Відэа Onliner.by даслаў чытач Алег.
- Двое рабочых на будоўлі паспелі адскочыць, калі фура звалілася ў катлаван. Яны ж дапамаглі кіроўцу выбрацца, разбіўшы для гэтага лабавое шкло. Кіроўца ў парадку, толькі лоб разбіў. І вось ён забраў з кабіны сумку з рэчамі, прайшло хвіліны паўтары, і фура загарэлася. Кажуць, у ёй лак быў, у Расею везлі. Выцек, напэўна, - распавёў чытач.
Сапраўды, чорны дым з таго боку бачылі нават у Менску.
- Пажарныя прыехалі, толькі тушыць амаль няма чаго: фура згарэла, - дадаў чытач.
Фура ехала ў напрамку Масквы.
- Усё адбылося на ўчастку дарогі, дзе вядуцца рамонтныя работы. Кіроўцу фуры на выгляд гадоў 40. Машына прабіла агароджу і з'ехала ў катлаван. Усё адбылося дзесьці а 15:30, - распавёў сведка.