Зімовае ацяпленне для «дармаедаў» падаражэе ў пяць разоў

Як будуць выглядаць рахункі для непрацоўных.

Цяпер на разглядзе ў Лукашэнкі знаходзіцца чарговым разам абноўлены дэкрэт №3. Не выключана, што «дакумент аб дармаедах» пасля падпісання будзе прадугледжваць стоадсоткавую аплату некаторых паслуг для доўгі час непрацоўных. Партал tut.by прыкладна падлічыў, колькі будуць плаціць за камунальныя паслугі тыя, хто згодна з абноўленым дэкрэтам №3 будзе ўважацца за ўтрыманца.

Нагадаем, як распавяла «дэпутат» «палаты прадстаўнікоў» Тамара Красоўская, каб стварыць умовы, пры якіх грамадзяне будуць зацікаўлены ў легальным працаўладкаванні, з 1 студзеня 2019 года плануецца выконваць не занятым у эканоміцы грамадзянам асобныя паслугі паводле коштаў (тарыфаў), што забяспечваюць поўную кампенсацыю эканамічна абгрунтаваных выдаткаў на іх выкананне.

- Пакуль абмяркоўваліся паслугі аплаты цяпла-і газазабеспячэння, але дакладны спіс вызначыцца пазней - падкрэсліла дэпутатка.

Вядома, выказаць здагадку, колькі менавіта будзе каштаваць амаль праз 1,5 гады камунальныя паслугі, даволі складана. Але мы надумалі падлічыць, колькі б каштавала «дармаедства» ў ацяпляльны перыяд жыхару тыпавой двухпакаёўкі на 47 «квадратаў» цяпер.

Такім чынам, напрыклад, у марозны снежань мінулага года на ацяпленне такой кватэры сышло 0,88093 Гкал. Стоадсоткавы тарыф цяпер складае 91,18 рубля. Атрымліваецца, калі б дэкрэт ужо працаваў у прапанаваным выглядзе, за ацяпленне «дармаед» заплаціў бы 80 рублёў (працоўны грамадзянін - блізу 15 рублёў). За газ (калі няма лічыльніка) давядзецца плаціць яшчэ амаль 6 рублёў замест 2,5 рубля.

У выніку, утрыманцам камунальнікі выставяць рахунак дзесьці на 60-70 рублёў даражэйшы, чым звычайна. Гэта значыць, рахунак у тыпавой двухпакаёўцы каштавацьме мінімум 110 рублёў.

Праўда, не варта забываць, што ўлады ўжо не раз казалі, што ў будучыні ўсе беларусы будуць плаціць за паслугі ЖКГ напоўніцу. Праўда, у якасці выключэння называецца менавіта ацяпленне, якое і займае самы вялікі радок у рахунках.