Кастрычнік ужо наступіў - а чырвоную стужачку на «БелДжы» так і не перарэзалі

Што пайшло не так з запускам беларуска-кітайскага аўтамабіля?

У красавіку гэтага года намеснік прэм'ер-міністра Беларусі Уладзімір Сямашка заявіў журналістам, што афіцыйнае адкрыццё новага завода «БелДжы» і пачатак масавай вытворчасці запланаванае на верасень, піша ex-press.by.

На сённяшні дзень гэта апошняя агучаная, хоць і не вельмі канкрэтная дата прыняцця ў эксплуатацыю завода для зборкі кітайскіх аўтамабіляў у Барысаўскім раёне. Раней яна прызначалася на 1 студзеня 2017 года, затым той жа Сямашка сказаў, што завод запусцяць у першым квартале. А калі першы квартал скончыўся, прагучала назва першага восеньскага месяца.

У той жа час, зацверджаны Саўмінам план-графік запуску «інавацыйных вытворчасцяў» прадугледжваў увод у эксплуатацыю завод СЗАТ «БелДжы» ў ліпені 2017 года.

Пачаўся кастрычнік, а пераможных рэляцый дагэтуль не чуваць. Праўда, міністр прамысловасці Віталь Воўк распавёў 14 верасня пра пачатак выпуску першай пробнай партыі з 222 машын. Такую колькасць павінны былі сабраць за тры дні. Пасля выпуску пробнай партыі завод, са слоў міністра, спыняцца ўжо не будзе.

Тым не менш, ўрачыстага пераразання чырвонай стужачкі перад аб'ектывамі тэле- і фота- камер пакуль не адбылося. Завод, відавочна, сапраўды, працуе, мяркуючы з паступова павялічанай колькасці гатовых аўтамабіляў на адкрытых пляцоўках, якія можна назіраць з дарогі Р53. Аднак колькі аўто выпускаецца за змену, незразумела. Ніякай афіцыйнай інфармацыі на гэты конт няма.

У кожным выпадку першыя продажы, як паведаміў міністр, пачнуцца толькі ў лістападзе. Гэта тлумачыцца тым, што, са слоў Сямашкі, дылеры, якія будуць прадаваць машыны з Барысава, пакуль не гатовыя выконваць карпаратыўныя стандарты кампаніі «Джылі» ў частцы сэрвіснага абслугоўвання.

Магчыма, варта ўлічваць і яшчэ адную акалічнасць.

Магчымасці барысаўскага завода для зборкі кітайскіх аўтамабіляў для нарошчвання выпуску сёння і ў агляднай будучыні абмежаваныя колькасцю машынакамплектаў, якія пастаўляюцца з Кітая.

Відавочна, што кітайскія ўдзельнікі закрытага супольнага акцыянэрнага таварыства «БелДжы» не зацікаўленыя ў тым, каб нарошчваць мёртвы груз складскіх запасаў. А пакуль сур'ёзнай перашкодай для рэалізацыі барысаўскіх «Джылі» застаецца невысокі ўзровень лакалізацыі вытворчасці, які складае пакуль блізу 14%.

Для таго, каб аўто прадаваліся ў Расейскай Федэрацыі, сёння трэба мець 30%, а з 1 студзеня 2018 году - 50%. Гэта значыць палову кошту кітайскага аўтамабіля павінны складаць працы і вырабы, зробленыя ў Беларусі.