Леанід Злотнікаў: У нас часта бывае, што сёння зарабілі, заўтра праелі

Ці здольны МАЗ вярнуць былыя пазіцыі?

Апошнім часам прамысловы гігант знаходзіцца, што называецца, на слыху.

Напрыклад, толькі ў лістападзе вытворца адзначыўся двойчы: у Кіеве і ў Калінінградзе, дзе завод здабыў тэндэр на пастаўку гарадскіх аўтобусаў, піша zautra.by.

Пацвярджае пазітыўную дынаміку прадпрыемствы і статыстыка: за восем месяцаў гэтага года Мінскі аўтамабільны завод павялічыў продажу тэхнікі на 29%. Пры гэтым на расейскі рынак было адгружана на 11% больш аўтамабіляў, чым за адпаведны перыяд мінулага года.

Ці здольны МАЗ вярнуць былыя пазіцыі?

На думку эканаміста Леаніда Злотнікава, росту аб'ёмаў продажаў прадукцыі, дэманстраванага МАЗам, відавочна недастаткова для выхаду прадпрыемства з крызісу.

- Рэч не ў тым, што яны паставілі больш або менш прадукцыі на экспарт, - заўважае экспэрт. - Рэч у тым, які прыбытак яны атрымалі.

Каб паспяхова развівацца, прадпрыемствы павінны мець не менш за 15-20% рэнтабельнасці, мяркуе суразмоўца.

- Калі яны выдаткаваліся на закупку дэталяў з-за мяжы, заплацілі рабочым - у выніку атрымаўся нуль, то заўтра будзе толькі горш. Прадпрыемства ж павінна змяняць тэхналогію, прадукцыю. На гэта патрэбныя грошы, інвестыцыі. А ў нас часта бывае, што сёння зарабілі, заўтра праелі, - кажа Леанід Злотнікаў.

Эканаміст нагадвае, што агулам у беларускай эканоміцы назіраецца спад інвэстыцыйнай актыўнасці.

- У апошнія некалькі гадоў прадпрыемствам нават дазволілі не накіроўваць амартызацыю па прызначэнні. Гэта значыць, яны выплачваюць заробак, але не ўкладаюць грошы ні ў капітальны рамонт, ні ў абнаўленне абсталявання.

Згасанне прадпрыемства пачынаецца задоўга да таго, як прыбытковасць знікне. А адбываецца яно тады, калі пачынае зніжацца інвестыцыйны складнік прадпрыемства. Вось гэта вельмі небяспечна, - дадае Леанід Злотнікаў.