«Пра Беларусь даведаўся дзякуючы Аляксандру Глебу»

У Менск едуць тытулаваныя кіберфутбалісты з усяго свету.

У мінулыя выхадныя вызначыўся склад гульцоў FIFA 18, якія прыедуць у канцы лістапада ў Менск на буйны турнір FCDB Cup'17 з прызавым фондам $10 000. На ім выступіць толькі адзін беларус, якому давядзецца змагацца з тытулаванымі спаборнікамі з Нямеччыны, Узбекістана, Кітая, Украіны, Галандыі і гэтак далей, піша onliner.by.

FCDB Cup'17 арганізуе футбольны клуб «Дынама-Брэст» пры падтрымцы Беларускай федэрацыі кіберспорту. Ён пройдзе ў Менску з 25 да 26 лістапада ў спартова-забаўляльным комплексе Club Falcon у дзвюх дысцыплінах — CS:GO і FIFA 18. Склад удзельнікаў апошняга вызначыўся: беларусы змогуць пазаўзець за Канстанціна Кецько — кіберфутбаліста ФК «Дынама-Брэст». Яму будуць супрацьстаяць спаборнікі з галандскіх «Аякса» і ПСВ, швэйцарскага «Базэля», кітайскіх «Гуанчжоў» і «Шаньдуня», а таксама мноства кіберфутбалістаў-адзіночак. Агулам Менск прыме 16 гульцоў у FIFA 18.

За нашага можна будзе заўзець як на онлайн - і тэлетрансляцыях, так і з трыбун: продаж квіткоў на турнір ужо пачаўся. Сачыць за баталіямі па CS:GO і FIFA 18 у жывым эфіры можна цягам двух дзён, з 25 да 26 лістапада.

Самым прадстаўнічым дэсантам можа пахваліцца Украіна, якую рэпрэзентуюць адразу чацвёра гульцоў. Адзін з іх — Віталь Муха з кіеўскага «Дынама». Ягоная футбольная кар'ера пачалася ў 8-гадовым узросце з юнацкай футбольнай школы «Юніёр». Хлопец паспеў сербануць традыцыйнага футбола і на сабе адчуць трэніроўкі, турніры, зборы і афіцыйныя матчы. Да падпісання кантракту з «Дынама» Віталь паспеў скончыць універсітэт і папрацаваць.

— Адчуваю, што знаходжуся цяпер у добрай форме, і спадзяюся на максімальны вынік. У Менску разыграюць досыць вялікую суму. Яна на ўзроўні буйных кіберфутбольных івентаў.

Да турніру актыўна рыхтуюся: гуляю шмат у спарынг-матчах. У Менску будзем гуляць у «рэжыме 85» (скіл усіх гульцоў у камандах роўны 85. — Заўв. Onliner.by). На жаль, у яго можна гуляць толькі таварыскія матчы, онлайн-турніраў практычна няма. У Еўропе ўжо год гуляюць Ultimate Team (гульцы зарабляюць, набываюць і абменьваюць віртуальных футбалістаў з розным узроўнем майстэрства і збіраюць каманду. — Заўв. Onliner.by). Гэта, вядома ж, больш складана ў плане арганізацыі, але трэба да гэтага імкнуцца.

Таксама ў Менск прыедзе шматразовы чэмпіён Нямеччыны і 4-ы ў сусветным топе Мухамед MoAubameyang Харкуа (Team Expert). Прызнаецца, не думаў, што Беларусь такая вялікая краіна. Пра яе ён чуў толькі дзякуючы футбалісту Аляксандру Глебу.

— Я думаю, што як топ-4 гульца ў свеце і тройчы чэмпіёна Нямеччыны спаборнікі будуць мяне паважаць. Усё ж у нас выступаюць найлепшыя гульцы свету, бо наладжаная добрая сістэма турніраў і кожны хоча стаць найлепшым. Але гульня новая, і кожны спаборнік можа перамагчы на турніры.

Мухамед да 2012 года гуляў у Pro Evolution Soccer. На FIFA пераключыўся, калі ў сваім горадзе змог перамагчы на турніры і падолець нямецкага чэмпіёна. Гэта і стала штуршком да прафесійнай кар'еры.

— У Англіі і Нямеччыне цалкам магчыма жыць і забяспечваць сябе кіберспортам. Таму што ў нас ёсць шмат фанатаў і спонсараў.

Напэўна, самым узроставым удзельнікам турніру будзе прадстаўнік «Лакаматыва» з Ташкента Абдусапі Legend Каюмаў. Кіберфутболам ён пачаў захапляцца яшчэ ў 1995 годзе. Характэрна, што першая FIFA International Soccer выйшла ў 1993 годзе. Але прафесійны шлях пачаўся ў 2012 годзе, калі ён увайшоў у топ-8 чэмпіянату свету WCG 2013 па FIFA 14.

— Кіберфутбол ва Узбекістане развіваецца: каля чатырох гульцоў афіцыйна падпісаныя рознымі клубамі. Плануем маштабныя спаборніцтвы, у тым ліку на дзяржаўным узроўні.

Працую ў прыватнай фірме, а кіберфутбол быў для мяне як хобі. Але з 2013 года пачаў прасоўванне на прафесійным узроўні.

Супраць беларускіх гульцоў выступаў некалькі раз у онлайн-турніры. Памятаю, сустракаўся з вашым суайчыннікам на LAN-турніры ў Маскве. І перамог з лікам 3:1. Узровень гульні ўражвае, думаю, будучыня ў кіберфутбола ёсць і ў Беларусі.

Найбліжэйшым часам вызначыцца склад удзельнікаў турніру і паводле CS:GO. У гэты момант заканчваецца плэй-оф за апошнія квоты на беларускі турнір. Спаборнікаў жа пакуль чакаюць GoodJob (ФК «Дынама-Брэст») і HellRaisers, якія атрымалі наўпроставае запрашэнне на турнір, а таксама дацкая Tricked і эстонская WASD, якія прайшлі праз закрытыя кваліфікацыі.

Дырэктар у развіцці ФК «Дынама-Брэст» Віктар Радзькоў адзначае, што кіберспорту ў стратэгіі развіцця клуба адводзіцца ледзь не галоўная роля.

— На гэты момант мы ацэньваем аўдыторыю кіберспорту як другасную для інтарэсаў футбольнага клуба. Але найбліжэйшыя пяць гадоў, паводле ўсіх ацэнак і прагнозаў, гэтая аўдыторыя наблізіцца да аўдыторыі футбольных заўзятараў. І магчыма, з другаснай стане першаснай.

Аўдыторыя кіберспорту расце ў геаметрычнай прагрэсіі. Ніводзін топавы еўрапейскі футбольны клуб не пакідае гэты факт без увагі. ФК «Дынама-Брэст» з'яўляецца піянерам у развіцці кіберспорту у Беларусі і адным з лідараў сярод клубаў Усходняй Еўропы.

Пра шанцы сваіх кіберспартоўцаў кіраўніцтва клуба адзначае, што не ставіць звышзадач для сваіх падапечных на турніры.

— Мы выдатна разумеем, што нашы каманды знаходзяцца ў стадыі росту. Чакаць ад іх высокіх вынікаў немагчыма. Тое, што яны памераюцца сіламі з гульцамі з усёй Еўропы і Кітая, — гэта ўжо вялікае для іх дасягненне.

Віктар Радзькоў не выключае, што гэты турнір стане штогадовай традыцыяй, а таксама намякае, што налета можна чакаць ад кіберспартовага «Дынама-Брэста» новых анонсаў.