Дадон заявіў, што войска Малдове не патрэбнае
13- 14.11.2017, 20:48
- 18,856
Прэзідэнт Малдовы заявіў, што ў краіне не павінна быць узброеных сіл «ні на левым, ні на правым берагах Днястра».
Прэзідэнт Малдовы Ігар Дадон мяркуе, што краіне не патрэбнае войска. Пра гэта ён сказаў у інтэрв'ю «Независимой газете».
Ён заявіў, што выступае за федэралізацыю Малдовы, і што «ўсе паўнамоцтвы» непрызнанай Прыднястроўскай Малдаўскай Рэспублікі трэба пакінуць.
У выпадку далучэння ПМР да Малдовы павінны быць «агульная дзяржаўнасць, агульная бюджэтная, банкаўская сістэмы, агульная замежная палітыка», але войска дзяржаве не патрэбнае, бо Малдова - «нейтральная краіна», і ў ёй не павінна быць узброеных сіл «ні на левым , ні на правым берагах Днястра».
Сацыяліст Дадон перамог на прэзідэнцкіх выбарах у Малдове 13 лістапада 2016 года. Яго інаўгурацыя прайшла 24 снежня. Ён неаднаразова крытыкаваў асацыяцыю з Еўрапейскім звязам і выступаў за стратэгічнае партнёрства з Расеяй. Падчас выбарчай кампаніі ён таксама казаў, што Крым належыць Расеі.