Каталіцкія біскупы Беларусі рыхтуюцца да сустрэчы з Папам Рымскім
1- 23.11.2017, 17:38
- 10,135
Візіт беларускіх біскупаў у Рым стане чацвёртым па ліку ў гісторыі сучаснай Беларусі.
Пра гэта было абвешчана 22 лістапада ў Рыме падчас 67-га пленарнага пасяджэння біскупаў, паведамляе catholic.by.
Візіт беларускіх біскупаў у Рым у рамках аd limina Apostolorum стане чацвёртым па ліку ў гісторыі сучаснай Беларусі. Апошні раз такі візіт адбыўся ў 2009 годзе.
Кульмінацыяй візіту стане сустрэча з Папам Рымскім. У 2017 годзе Пантыфік унёс змены ў пратакол візітаў Ad limina - цяпер сустрэчы біскупаў з Пантыфікам адбываюцца за зачыненымі дзвярыма.
«Нам трэба прадэманстраваць свой Касцёл: хто мы такія, адкуль прыбылі, як мы жывем, якія праблемы існуюць? Мы гаворым адкрыта аб нашых праблемах. Напрыклад, тое ж пытанне падпісання канкардату ці пагаднення паміж Канферэнцыяй Біскупаў і дзяржавай», - тлумачыць мітрапаліт Менска-Магілёўскі арцыбіскуп Тадэвуш Кандрусевіч мэту будучай паездкі.
Падчас візіту біскупы будуць ладзіць Імшу ў чатырох вялікіх рымскіх базіліках: святога Пятра, святога Паўла за мурамі, святога Яна Латэранскага і святой Марыі Вялікай (Санта-Марыя-Маджорэ).