15-гадовы школьнік запускае вытворчасць 3D-друкарак у Беларусі

Даніла Елісееў з шасці гадоў займаецца радыёэлектронікай.

Даніла Елісееў - выпускнік Школы прадпрымальніцтва для падлеткаў TeenGuru. Яму 15 гадоў, з іх 9 ён займаецца радыёэлектронікай, піша bel.biz. Хлопец пачынаў з канструктара «Знаўца», пазней стаў разбіраць зламаныя бытавыя прыборы і рабіць з іх нешта сваё: блок сілкавання для прылады ладавання, мікракантролеры. А цяпер Даніла плануе наладзіць масавую вытворчасць недарагіх і якасных 3D-друкарак D3D. У гэтым яму дапамагае бізнэсовец Алег Хусаенаў, CEO Зубр Капітал.

«А ці змагу я зрабіць 3D-друкарку?»

Спытаў сам сябе Даніла, калі разбіраць старую тэхніку і выпаіваць з яе дэталі надакучыла. Ён стаў канструяваць свае прыборы, для якіх спатрэбіліся карпусы. Іх даводзілася выпілоўваць з фанеры ў кабінеце працы, але гэта было доўга і складана, а без дакладных станкоў не заўсёды атрымлівалася з першага разу вытрымаць патрэбныя памеры.

«Тады я ўбачыў у бацькі на працы 3D-друкарку, але яе кошт мяне непрыемна здзівіў – больш за 2000 даляраў. Для мяне - непад'ёмная сума. І я наважыў паспрабаваць зрабіць 3D-прынтэр сам. Мне нават стала цікава, ці змагу я зрабіць такі складаны прыбор сваімі рукамі», - распавядае Даніла.

Інструкцыі і парады па зборцы вынаходнік знаходзіў форумах накшталт 3DToday, але ён адразу наважыў, што гэта не будзе сабраная па чужых чарцяжах друкарка. Даніла вывучыў асноўныя варыянты «самазборных» прылад і наважыў узяць з кожнае самае ўдалае рашэнне.

Асаблівасці D3D

Друкарка Данілы не стала проста сумай пераваг тэхнікі канкурэнтаў. Юны інжынер развязаў галоўны галаўны боль адэптаў 3D-друкі - замену ўсёй платы праз адзін згарэлы драйвер. Часта вытворцы спецыяльна збіраюць на адной плаце ўсе элементы, і пры гэтым яны не падлягаюць замене. Даніла выкарыстоўвае модульнае развязанне: калі адзін элемент выйшаў са строю, яго можна памяняць, не чапаючы астатнюю электроніку.

Запчасткі па даступнай цане заўсёды можна купіць у кітайскіх інтэрнэт-крамах, няхай гэта будзе транзістар, шлейф ад матора або друкарская «галоўка».

«А тыя запчасткі для друкаркі, якія можна надрукаваць на гэтай жа друкарцы, мы самі будзе прапаноўваць пакупнікам. Напрыклад, экструдар. Людзі па неасцярожнасці нярэдка ламаюць яго, прыкладаючы занадта вялікую сілу. Маю прыладу можна будзе лёгка паправіць пры неабходнасці, гэта будзе амаль open source друкарка, - распавядае аўтар праекта.

Мая друкарка адрозніваецца і корпусам - ён тут фанерны, а не пластыкавы, як практычна ва ўсіх канкурэнтаў. Фанера таўшчынёй у 6 мм аказваецца больш трывалай, лягчэйшай і таннейшай чым пластык».

Як працуе друкарка

Прынцып працы такі ж, як і ў іншых рынкавых варыянтаў: мадэль для друку загружаецца з флэшкі, друкарка награваецца і друкуе прадмет. Асноўны аб'ём энэргіі траціцца як раз на разагрэў: пасля гэтага прылада падтрымлівае тэмпературу па прынцыпе тэрмапота.

У друкарцы Данілы адкрытая платформа, г.зн. камеры для друку, у якой падтрымліваецца стабільная тэмпература, няма. Большасць друкарак з адкрытай платформай абмежаваныя ў выбары нітак для друку - праз перапады тэмператур трэба выкарыстоўваць толькі тэрмаўстойлівыя пластыкі. Але Даніла гэтае пытанне вырашыў:

«У маёй друкарцы платформа падаграваецца, максімум да 150°. Таму няма моцных перападаў тэмпературы і ўсаджвання вырабу. Друкарка можа друкаваць рознымі відамі пластыкаў, акрамя полікарбаната і FLEX'а».

Друкарская «галоўка» ў друкарцы Данілы перасоўваецца па восях Z і X - уверх-уніз, направа-налева. А платформа з сталом нагрэву рухаецца наперад-назад, па восі Y. У наступнай мадэлі, D3D Pro, платформа стане большай, з'явіцца магчымасць друкаваць трыма колерамі. Друкаванае сопла застанецца адно, але ў яго можна будзе адначасова падаваць рознакаляровы пластык аднаго віду.

3D-друк + ЧПУ-станок + лазерны гравёр

Простую 3D-друкарку для дзяцей і гурткоў робататэхнікі Даніла ўжо сабраў, а цяпер працуе над комплексным універсальным развязаннем. Яно будзе ўключаць у сябе адразу тры модулі: друкарку, ЧПУ-устаноўку і лазерны гравёр.

Гэты прыбор будзе асабліва карысны стартапам і hardware-кампаніям: прататып можна будзе надрукаваць на друкарцы, не заказваючы яго на заводзе. Фабрычнае выраб - гэта доўга і дорага, бо мінімальны заказ ў гэтым выпадку стартуе ад сотні дэталяў. А калі надрукаваць трэба металам, то адзін толькі запуск «металічнай» 3D-друкаркі каштуе 50 еўраў. А яшчэ праца і расходныя матэрыялы. Некалькі надрукаваных металічных дэталяў могуць абыйсціся вам па кошце як цэлы 3D-прынтэр.

Развіццё праекта

Са сваёй друкаркай Даніла ўдзельнічае ў праекце «Мой бізнэс» на АНТ. На праект «Мой бізнэс» Даніла прыйшоў з ідэяй стварэння масавай вытворчасці беларускіх 3D-друкарак, пра якія мы распавялі вышэй. Ментар Алег Хусаенаў здолеў зірнуць на гэты бізнэс з іншага боку: на рынку прафесійнага 3D-друку даволі высокая канкурэнцыя, і ёсць дасведчаныя гульцы, якія шмат гадоў утрымліваюць свае пазіцыі.

Ментар яго каманда прапанавалі новы фармат для праекта, больш просты ў рэалізацыі і зразумелы юнаму прадпрымальніку Данілу - стварэнне 3D-друкаркі канструктара для падлеткаў.

«У такога прадукту ёсць шмат пераваг. Гэта выдатны падарунак для падлетка. Бо збіраць свой 3D-прынтэр - занятак займальны. Да таго ж вы атрымліваеце паўнавартасную прыладу, на якой пасля зможаце друкаваць 3D-мадэлі», - адзначае Даніла.

Водгукі першых пакупнікоў пацвярджаюць: 3D-друкарка, якую атрымалася стварыць пры ментарскай падтрымцы Зубр Капітал, - выдатны спосаб аб'яднаць бацькоў і падлеткаў за зборкай друкаркі-канструктара. Канчатковая кошт такой друкаркі будзе даступным - не больш за 200 USD.

Беларускі рынак, са слоў Данілы, пакуль адносна вольны - у нас ёсць усяго тры кампаніі, якія вырабляюць 3D-друкаркі. Для параўнання, у Расеі бытавыя друкаркі для 3D-друку выпускае больш за 100 кампаній.

«Я стараўся зрабіць вельмі якасны прыбор. Друкаркі такога ж памеру і кошту, якія прадаюцца на рынку, не будуць друкаваць гэтак жа дакладна і якасна. Мы зможам канкурыраваць з імі па цане, прапаноўваючы пры гэтым лепшую якасць. Да таго ж сегменты, у якія цаляе D3D - стартапы, школы і ўніверсітэты - пакуль незанятыя», - разважае Даніла Елісееў.