Што падаражэе ў Беларусі у 2018 годзе
24- 10.12.2017, 21:33
- 252,944
«Сюрпрызы» чакаюць аўтамабілістаў і арандатараў жытла.
З 1 студзеня ў Беларусі вырастуць штрафы, дарожны збор, падаткі і мыты.
Гэта здарыцца праз падвышэнне базавай адзінкі, сума якой складзе 25 рублёў.
Такім чынам, у параўнанні з цяперашняй сумай яна стане большай на 2 рублі, ці амаль на 9%. Следам за базавай павялічацца і залежныя ад яе выплаты, піша «Брестская газета».
Парушаць стане даражэй
Асноўнае выкарыстанне базавая адзінка знаходзіць у сферы штрафаў за правапарушэнні. Уласна, дзеля гэтага яна і ўводзілася ў 2002 годзе.
Так, напрыклад штрафы ДАІ зменяцца наступным чынам.
За перавышэнне хуткасці, зафіксаванае супрацоўнікам Дзяржаўтаінспекцыі:
- ад 10 да 20 км/г - да 1 базавай адзінкі (25 рублёў);
- ад 20 да 30 км/г - ад 1 да 3 базавых адзінак (25 - 75 рублёў);
- на 30 і больш км/г - ад 3 да 10 базавых адзінак (75 - 250 рублёў);
- на 20 і больш км/г, учыненае паўторна цягам года - ад 5 да 15 базавых адзінак (125 - 375 рублёў).
За перавышэнне хуткасці, зафіксаванае аўтаматычнай камерай:
- ад 10 да 20 км/г - 0,5 базавай адзінкі (12,5 рублёў);
- ад 20 да 30 км/г - 2 базавыя адзінкі (50 рублёў);
- ад 30 да 40 км/г - 4 базавыя адзінкі (100 рублёў);
- на 40 і больш км/г - 6 базавых адзінкі (150 рублёў).
За не пройдзены своечасова тэхагляд - ад 1 да 3 базавых адзінак (25 - 75 рублёў).
За размову праз мабільны тэлефон падчас руху - да 2 базавых адзінкі (50 рублёў).
За парушэнне правілаў перавозкі пасажыраў - да 4 базавых адзінак (100 рублёў).
Добрасумленным аўтамабілістам таксама давядзецца плаціць больш
Як вядома, з 31 снежня 2013 года беларускія аўтамабілісты плацяць так званы транспартны падатак. Так у Сінявокай празвалі уведзеную дзяржаўную мыту за выдачу дазволу на ўдзел аўтамабіля ў дарожным руху. Яна таксама вылічаецца зыходзячы з сумы базавай адзінкі.
Так, з 1 студзеня 2018 года для фізічных асоб гэты транспартны падатак будзе складаць:
- на аўтамабілі да 1,5 тоны - 75 рублёў;
- ад 1,5 да 2 т - 150 рублёў;
- ад 2 да 3 т - 200 рублёў;
- больш за 3 т - 275 рублёў.
Ад базавай адзінкі «скачуць» у Беларусі і іншыя мыты - пры звароце ў суд, ЗАГС, органы ўнутраных спраў і іншыя дзяржустановы.
Што яшчэ зменіцца следам за базавай адзінкай?
Наогул базавая адзінка ў нашай дзяржаве ўплывае на колькасныя паказчыкі больш як 200 нарматыўных актаў Беларусі. Нароўні са штрафамі і дзяржмытамі ад яе сумы залежаць таксама некаторыя падаткі і дапамогі, кошт паслуг і плата за пражыванне, напрыклад.
Так, базавая адзінка выкарыстоўваецца пры разліку дапамогі з прычыны беспрацоўя, сума якой сягоння вагаецца ад 16,1 да 46 рублёў на месяц, а са студзеня будзе складаць 17,5 - 50 беларускіх рублёў.
Павялічыцца з 1 студзеня «дзякуючы» базавай адзінцы і рамесны збор разам са зборам за занятак аграэкатурызмам. Абодва раўняюцца 1 базавай адзінцы, а значыць, павялічацца на 2 рублі.
Жыць у дзяржаўным арэндным жыллі і інтэрнаце таксама стане даражэй. Кошт платы за пражыванне таксама залежыць ад сумы базавай адзінкі. Як і «сабачы падатак», які складае 30% ад яе велічыні, а для сабак патэнцыйна небяспечных парод - 150%.
Сярод «закладнікаў» базавай адзінкі можна назваць натарыяльныя тарыфы, кошт рыэлтарскіх паслуг і матэрыяльную дапамогу беспрацоўным.