Лукашэнка прызначыў новых кіраўнікоў Службы Бяспекі і ААЦ

Дыктатар правёў шэраг кадравых прызначэнняў.

Аб прынятых Аляксандрам Лукашэнкам кадравых пастановах распавёў журналістам Дзяржаўны сакратар Савета Бяспекі Станіслаў Зась пасля нарады Лукашэнкі з кіраўнікамі шэрагу сілавых структур. Пра гэта паведамляе выданне sb.by.

Начальнікам Службы бяспекі Лукашэнкі прызначаны палкоўнік Дзмітрый Шахрай, які раней займаў пасаду намесніка начальніка Службы бяспекі Лукашэнкі і апошнім часам выконваў абавязкі начальніка Аператыўна - аналітычнага цэнтра.

Начальнікам Аператыўна - аналітычнага цэнтра прызначаны палкоўнік Андрэй Паўлючэнка, які раней займаў пасаду начальніка Службы бяспекі Лукашэнкі.

Станіслаў Зась звярнуў асаблівую ўвагу на тое, што абодва афіцэры добра зарэкамендавалі сябе ў працы на ранейшых пасадах і прынятая пастанова ў найбольшай ступені ўлічвае іх дзелавыя якасці.

- Палкоўнік Паўлючэнка паспяхова працаваў на пасадзе начальніка Службы бяспекі Лукашэнкі. Да яго няма ніякіх прэтэнзій. Але, улічваючы ягоны патэнцыял як аператыўнага работніка, як спецыяліста-аналітыка, прынятая такая пастанова... Палкоўнік Шахрай справіўся з задачай, якая перад ім стаяла ў ААЦ - ускалыхнуць калектыў, навесці парадак і наладзіць працу.

Нарада ў Лукашэнкі, са слоў Станіслава Зася, была прысвечаная барацьбе з карупцыяй і гарантаванні бяспекі агулам.

- Акцэнт зроблены на працы двух падраздзяленняў - Службы бяспекі і Аператыўна-аналітычнага цэнтра пры Лукашэнку. Разглядаўся існы стан спраў і задачы, якія развязваюцца гэтымі дзвюма структурамі.

Нагадаем, 13 кастрычніка Аляксандр Лукашэнка правёў экстраную нараду з прадстаўнікамі сілавых структур. Падчас нарады Лукашэнка адхіліў ад пасад «некаторых кіраўнікоў і супрацоўнікаў» Аператыўна-аналітычнага цэнтра (ААЦ) да заканчэння расследавання «пададзеных яму на разгляд фактаў».

«У сувязі з прэтэнзіяй да іх працы з боку камісіі, створанай на даручэнне Лукашэнкі, якая вывучала дзейнасць ААЦ, Лукашэнкам прынятая пастанова аб часовым адхіленні ад займаных пасадаў некаторых кіраўнікоў і супрацоўнікаў Аператыўна-аналітычнага цэнтра да заканчэння расследавання фактаў, пададзеных Лукашэнку», - было сказана ў паведамленні.