Эксперт: Для паслаблення рубля з'явіліся новыя прычыны

Валюта ў абменніках можа неўзабаве скончыцца.

Жанна Кулакова, фінансавая кансультантка кампаніі «ТэлеТрэйдБел», тлумачыць, што адбывалася з валютамі на мінулым тыдні, і дае прагноз на наступны:

- Беларускі рубель прадаўжае слабець. За апошні тыдзень нацыянальная валюта страціла да кошыка 0,2%. Пры гэтым курс даляра вырас на 0,5%, да 2,0330, еўра падаражэў на 0,05%, да 2,3973, а расейскі рубель - на 0,1%, да 3,4336. Як бачым, беларускі рубель ізноў упаў да ўсіх трох замежных валют.

На мінулым тыдні мы выказалі здагадку, што ў лістападзе нацыянальная валюта слабела ў асноўным праз унутраныя фактары. А цяпер атрымалі гэтаму пацверджанне - паводле апошніх звестак Нацыянальнага банка, у лістападзе на ўнутраным рынку ўпершыню за год быў зафіксаваны дэфіцыт замежнай валюты. Прадпрыемствы прыкметна нарасцілі набыццё, а насельніцтва, наадварот, знізіла продаж. У выніку сукупная чыстая купля замежнай валюты склала 135 млн даляраў. Паводле закону попыту і прапановы такое становішча рэчаў павінна было прывесці да паслаблення рубля. Так і атрымалася.

Казаць пра тэндэнцыі пакуль заўчасна - адзін месяц у годзе яшчэ не паказчык. Але статыстыка кажа пра тое, што ўжо ў жніўні і верасні ўнутраны рынак быў літаральна ў адным кроку ад дэфіцыту замежнай валюты. Так што лістападаўскі чысты попыт не выглядае выпадковасцю, але наспяваў некалькі месяцаў.

Так ці інакш, дэфіцыт замежнай валюты стварае перадумовы для паслаблення беларускага рубля, і калі ён будзе захоўвацца, тэмпы падзення нацыянальнай валюты могуць паскорыцца. Вялікая імавернасць, што курсы валют у нашых абменніках найбліжэйшым часам будуць паступова расці.