У Віцебску маці і дачку хочуць судзіць за зрэзаныя кветкі з клумбы

CК распачаў справу паводле факту рабавання, учыненага групай асоб.

У Віцебску маці і дачку хочуць судзіць за тое, што зрэзалі з клумбы кветкі. Жанчына і ейная дачка-падлетак у канцы кастрычніка зрэзалі з клумбы ў двары шматпавярховіка 25 кветак расходнік, каб зрабіць ікебану. Гэта заўважыла жыхарка дома з першага паверха, зняла "акт вандалізму" на камеру і напісала заяву ў міліцыю.

Следчы камітэт пачаў крымінальную справу паводле факту рабавання, учыненага групай асоб. За сарваныя з клумбы кветкі маці з дачкой пагражае абмежаванне волі тэрмінам да 5 года або пазбаўленне волі тэрмінам ад 2 да 6 гадоў, піша tut.by.

Адвакат Ігар Сцяпанаў, які абараняе інтарэсы абвінавачаных у рабаванні жанчыны, апублікаваў пастанову аб распачынанні крымінальнай справы ў Фэйсбуку. Ён звяртае ўвагу на малазначнасць дзеяння і не бачыць падстаў для крымінальнага пераследу. Да таго ж кветкі расліны ўсё адно павінны былі зразацца на зіму прыкладна ў гэты час. Канкрэтнага ўласніка кветкі не мелі - клумба можа належаць таварыству ўласнікаў.

Тым не менш крымінальную справу распачалі ў дачыненні не толькі да маці, але і ейнай 15-гадовай дачкі. Дзяўчыну паставілі на ўлік сацыяльна-небяспечнага становішча (СНС), хоць не было ні пастановы суда, ні заканчэння расследавання справы.

Адвакат падрыхтаваў скаргу ў пракуратуру горада, у якой ставіць пад сумнеў законнасць і абгрунтаванасць распачынання крымінальнай справы.