Генадзь Фядыніч: Мне перашкаджаюць працаваць

Улады прадаўжаюць устаўляць палкі ў колы незалежнаму прафзвязу РЭП.

Крымінальная справа супраць лідараў незалежнага прафзвязу радыёэлектроннай прамысловасці (РЭП) «не забараняе Генадзю Фядынічу абараняць правы працоўных», сцвярджае Следчы камітэт Беларусі, паведамляе «Радыё Свабода».

Пра гэта гаворыцца ў адказе СК на адрас Беларускага кангрэсу дэмакратычных сілаў.

Тое, што робяць следчыя, накіраванае на вывучэнне ўсіх «за» і «супраць» у гэтай справе:

«У межах крымінальнай справы праводзяцца дзеянні збору доваднай базы, якія як выкрываюць, так і апраўдваюць кіраўнікоў Беларускага прафзвязу радыёэлектроннай прамысловасці ва ўчыненні дзеяння, якія ім інкрымінуюцца. Ажыццяўленне папярэдняга расследавання не перашкаджае дзейнасці РЭП і накіраванае на ўстанаўленне ісціны паводле справы», - напісана ў адказе Следчага камітэта.

Кіраўнікі Беларускага кангрэсу дэмакратычных сіл атрымалі адказ на свой зварот у Следчы камітэт 27 снежня.

Фядыніч не згодны з ацэнкай Следчага камітэта

Старшыня РЭП Генадзь Фядыніч сказаў «Свабодзе», што ён не згодны з высновамі кіраўніцтва Следчага камітэта.

«Ну як жа не перашкаджае?! Кампутары нам дагэтуль не вярнулі. Мне забаронена выязджаць за мяжу», - кажа прафсаюзны кіраўнік.

У пачатку лістапада Следчы камітэт не даў Фядынічу дазволу выехаць у Жэневу на сустрэчу лідараў міжнароднага аб'яднання прафзвязаў прамысловых рабочых IndustriALL, які ахоплівае 50 мільёнаў чалавек у 140 краінах.

Генеральны сакратар IndustriALL Вальтэр Санчэс раней напісаў ліст-зварот у Следчы камітэт. Улічваючы абмежаванні ў перамяшчэнні Фядыніча, звязаныя з дадзенай ім падпіскай аб нявыездзе, міжнародная арганізацыя давала гарантыі своечасовага вяртання Фядыніча ў Беларусь.

Са слоў кіраўніка РЭП, на люты 2018 года плануецца прыезд у Беларусь дэлегацыі міжнароднага прафзвязу.