Мінфін РФ: Да вычэрпвання Рэзэрвовага фонду засталося тры тыдні

У астатнія тры тыдні 2017 года ўрад Расеі плануе цалкам выдаткаваць Рэзэрвовы фонд.

Пра гэта паведаміў на пасяджэнні кабінета міністраў кіраўнік Мінфіна Расеі Антон Сілуанаў. Пра гэта піша finanz.ru.

На 1 снежня ў фондзе, які збіраўся за кошт нафтагазавых даходаў у перыяд "сытых" гадоў нафты за 100 даляраў за барэль, заставалася 992 млрд рублёў.

У параўнанні з лютым 2015-га, калі фонд распачалі, каб заткнуць дзірку ў федэральным бюджэце, яго памер скараціўся амаль у 6 разоў, або на 4,9 трыльёна рублёў.

"Сёлета мы цалкам выкарыстоўваем сродкі Рэзэрвовага фонду, як і было прадугледжана законам аб бюджэце", - паведаміў Антон Сілуанаў.

Згодна з дакументам, агулам мае быць выдадзена 1,06 трлн. Гэтая сума большая, чым фактычны памер фонду, але выправіць сітуацыю можа снежаньскае паслабленне рубля: актывы Рэзэрвовага фонду ўкладзеныя ў замежныя валюты (даляр, еўра і брытанскі фунт), а яго рублёвы памер, такім чынам, павялічваецца падчас дэвальвацыі.

Каб выканаць план, Мінфіну патрэбны росту курсу бівалютнага кошыка на 6,8%: гэта адпавядае скачку даляра на 4 рублі, да 63,3 рубля, а еўра - на 4,4 рубля, да 73,8 рубля.

Яшчэ 662 млрд рублёў сёлета возьмуць з Фонду нацыянальнага дабрабыту, паведаміў Сілуанаў: яго пачалі выдаткоўваць у верасні для кампенсацыі дэфіцыту бюджэту Пенсійнага фонду. За тры месяцы з ФНД сышло 490 млрд рублёў.

З наступнага года хуткасць выдаткавання ФНД павялічыцца амаль удвая, вынікае з закона аб бюджэце, які быў падпісаны Уладзімірам Пуціным у сярэдзіне тыдня: агулам з фонду плануецца ўзяць 1,113 трлн.

На 1 студзеня ў ФНД застанецца 3,7 трыльёна рублёў, заявіў Сілуанаў. Зрэшты, больш за траціну гэтай сумы - Br1,4 трлн - ужо ўкладзена.

На першапачаткова заяўленыя мэты - рэалізацыю "самаакупляльных інфраструктурных праектаў" - пайшло толькі 12% ФНД, або 506 млрд рублёў.

200 млрд рублёў і 6,25 млрд даляраў было кінута на выратаванне “Внешэкономбанка”, які праз санкцыі Захаду і стратныя вялікія будоўлі апынуўся на мяжы дэфолту ў 2016 годзе. Яшчэ 3 млрд даляраў пайшло на куплю еўрааблігацый Украіны ў спробе ўтрымаць пры ўладзе Віктара Януковіча за два месяцы да ягонага скідання і ўцёкаў з краіны.

279 млрд рублёў былі ўлітыя ў капітал расейскіх дзяржаўных банкаў праз куплю іх прывілеяваных акцый.

"Ліквіднасць часткі ФНД, то бок вольная рэшта, не укладзеная ў актывы, складае 2,3 трлн рублёў", - паведаміў Сілуанаў. Ён нагадаў, што з пачатку 2017 года ўрад скупляе на біржы валюту для папаўнення рэзэрваў, і гэтая практыка працягнецца ў 2018 годзе.

Рэзэрвы "нам патрэбныя, бо па-ранейшаму ўсё-такі мы залежым ад сыравіннага складніка і нафтагазавых даходаў", - патлумачыў міністр.

З улікам змен у бюджэтнае правіла Мінфін можа набыць на біржы блізу 20 млрд даляраў налета, прагназуюць аналітыкі Райффайзэнбанка. Калі пры гэтым улады здолеюць аслабіць рубель (да адзнак 64 за даляр з нафтай 50 за барэль), то ФНД можа папоўніцца на 1,5 трыльёна рублёў - гэта значыць, дэ-факта дадатковыя сродкі, якія прыйдуць у фонд, перавысяць выдаткі з яго, разлічылі ў банку.