Сям'і з трыма дзецьмі пад Менскам у маразы адключалі газ

Жыхар прыватнага дома пад Менскам распавёў: на мінулым тыдні газавікі адключылі газазабеспячэнне падчас праверкі.

Прычына: у доме не аказалася акта аб штогадовай праверцы вентыляцыйных каналаў. Праз дзень газ у дом вярнуўся, але чытач задаецца пытаннем: адкуль звычайнаму спажыўцу ведаць аб тым, што такая праверка неабходная?

Жыхар: «Газ адключылі, нягледзячы на довады, што на вуліцы мароз, а ў хаце трое маленькіх дзяцей»

Тарас Парфяновіч жыве пад Менскам, у прыватным доме ў вёсцы Баравая, ацяпленне і гарачая вада з'яўляюцца за кошт газавага катла і калонкі, піша tut.by.

— 15 лютага да нас прыйшоў слесар-аварыйшчык з Мінгазу і запатрабаваў падаць акт аб штогадовай праверцы газавых комінаў і вентыляцыйных каналаў. Такога акту ў нас не было, бо я аб ім тады ўпершыню даведаўся, — распавядае Тарас. — Я патлумачыў, што за два тыдні дагэтуль да нас ужо прыходзілі з Мінгазу і правяралі, ці ёсць уцечка газу, ці ёсць цяга. Тады нам сказалі, што ўсё ў парадку. Цяпер слесар пацвердзіў, што з газавай сістэмай, комінамі і вентыляцыяй у доме сапраўды няма праблем. Але няма акту, які выдаецца іншай арганізацыяй — Белвентыляцыяй — а значыць, ён абавязаны адключыць нас ад газу, паводле фармальнай прыкмеце.

Чытач тлумачыць: газ адключылі, нягледзячы на довады, што на вуліцы мароз, а ў хаце трое маленькіх дзяцей. Гэта яго абурыла.

— Справа ў тым, што да нас раней штогод прыходзіў хто-небудзь з Мінгазу, аглядаў сістэму. Ніколі нам не казалі, што патрэбныя яшчэ чыйсьці дазвол. Калі я даведаўся, што такі акт патрэбен, то запэўніваў, што заўтра ж усё зраблю, атрымаю яго. Але слесар сказаў: «не трэба, у мяне інструкцыя». Пры гэтым ён жа распавёў, што цяпер усіх так адключаюць. І што, відавочна, мала хто ў курсе, што трэба праходзіць штогадовую праверку ў яшчэ адной арганізацыі.

З Белвентыляцыяй Тарас Парфяновіч звязаўся ў той жа дзень.

— Дарэчы, там мне сказалі, што з аналагічнымі праблемамі ў іх у той дзень было ўжо дзесяць зваротаў.

Раніцай 16 лютага да яго прыехалі спецыялісты, якія праверылі вентыляцыю і склалі акт. Паслуга каштавала 31 рубель. У той жа дзень слесар Мінгазу вярнуўся і зноў падключыў газазабеспячэнне. Падключэнне калонкі ў Мінгазу каштавала 25 рублёў без чэка.

Мінгаз: «Спажывец сам павінен занепакоіцца праверкай комінаў перад ацяпляльным сезонам»

У Мінгазе тлумачаць: чалавек мае права карыстацца газавым абсталяваннем толькі пасля таго, як прайшоў у іх інструктаж і падпісаў дамову з газаўшчыкамі.

— Падчас інструктажу распавядаюць: кожны год перад ацяпляльным сезонам, павінны правярацца дымавыя вентканалы. Тое, што карыстальнік гэтага не ведаў, — не вызваляе ад адказнасці. Калі ён жадае — Мінгаз, Батанічная, 11 — правядзём інструктаж для яго і сямейнікаў.

Газаўшчыкі сцвярджаюць: вентыляцыю трэба рэгулярна правяраць і гэта прапісана ў дамове на пастаўку газу.

— Калі гэта прыватны дом з імпартным газавым катлом, які абслугоўвае нейкі сэрвісны цэнтр — то раней цэнтры ў асноўным не патрабавалі нейкіх актаў. Таму што ім, у прынцыпе, гэта не трэба, — кажуць у Мінгазе. — Цяпер, калі пачасціліся выпадкі атручванняў, мы абавязалі і сэрвісныя цэнтры пры правядзенні тэхабслугоўвання патрабаваць усе дакументы, акты праверкі. Калі сэрвісны цэнтр прыйшоў на тэхабслугоўванне, выявіў, што акта няма, — пакідаюць прадпісанне і інфармуюць нас. Мы бярэм гэты адрас на кантроль. Калі акт праверкі комінаў не даюць — на жаль, мы маем права адключыць газазабеспячэнне. У першую чаргу дзеля бяспекі самога грамадзяніна.

У Белвентыляцыі раяць вывучыць правілы карыстання газам у побыце (зацверджаныя пастановай Савета міністаў №1539), дзе ўсё падрабязна распісана. Напрыклад, тое, што спажыўцы газу абавязаны забяспечваць праверку стану дымавых і вентыляцыйных каналаў. Рабіць гэта могуць як спецыялізаваныя арганізацыі (у іх павінны быць дазвол), так і самі ўласнікі (але для гэтага трэба прайсці спецыяльнае навучанне).

У Белвентыляцыі патэнцыйных кліентаў напярэдадні ацяпляльнага сезона не абтэлефаноўваюць. Чалавек звяртаецца ў арганізацыю сам. Паслуга платная.

— Кліент заказвае паслугу — мы выязджаем і праводзім абследаванне сістэм вентыляцыі і дымавыдалення. Між іншым, замеры кратнасці паветраабмену (наяўнасць цягі) мы правяраем адмысловымі прыборамі, якія праходзяць паверкі ў «БелДІМ».

На пытанне, ці стала больш выпадкаў, калі спажыўцам адключаюць газ за тое, што няма акта аб праверцы комінаў, у арганізацыі не адказваюць.

— Калі існуе небяспека для жыцця грамадзян — газ маюць права адключыць. Самае галоўнае, чым варта кіравацца ў нашай працы, — гэта пытаннямі бяспекі.