Якімі яшчэ паборамі ўлады хочуць абкласці аўтамабілістаў?
64- 28.02.2017, 9:09
- 16,699
Мінтранс збіраецца «ўдасканаліць» дарожны збор.
Чыноўнікі зноў задумаліся пра тое, як правільна збіраць з аўтамабілістаў грошы на рамонт дарог.
У канцы лютага кіраўнік «Менскаблдарбуда» Дзяніс Сцяпанаў прапанаваў перагледзець сістэму збору транспартнага падатку і ўключаць яго ў кошт паліва, патлумачыўшы гэта тым, што такая схема больш апраўданая – «чым больш чалавек ездзіць, тым больш ён і плаціць».
Пазней на такую ідэю адрэагаваў у эфіры тэлеканала «Беларусь 1» першы намеснік міністра транспарту Аляксей Аўраменка. Чыноўнік адзначыў, што «гэты механізм можа быць удасканалены, але гаворка не ідзе пра ўключэнне дарожнага збору ў кошт паліва».
Ці давядзецца беларускім аўтамабілістам зноў раскашэліцца?
Сухаў: Стаўкі транспартнага падатку будуць расці
Прадстаўнік аб'яднання «За аўто» Фёдар Сухаў лічыць, што як-небудзь удасканаліць існуючую мадэль улады наўрад ці змогуць.
– Пераносіць транспартны падатак у кошт паліва яны не стануць, бо гэта будзе нонсэнс – бо туды ўжо ўключаны акцыз. У гэтым выпадку ў кошце паліва будзе адразу два падаткі на дарожныя патрэбы, – адзначае экспэрт у каментары «Заўтра тваёй краіны».
Тым не менш, суразмоўца ўпэўнены, што чыноўнікі будуць падымаць стаўку падатку, таму што «бюджэт трашчыць па швах».
– Словы аб удасканаленні – гэта нагода, каб зацягнуць час. У нас ёсць сістэма BelToll, і калі выкарыстоўваць тыя грошы, якія яна прыносіць, можна ўсю краіну пакрыць першакласнымі дарогамі, – лічыць Фёдар Сухаў.
Суразмоўца заўважае, што з 2013 года стан дарог стаў істотна пагаршацца.
– Дастаткова ад'ехаць на 100 кіламетраў ад Менска і з’ехаць з трасы – і вы ўбачыце, што з дарогамі наогул бяда. Я ведаю некалькі населеных пунктаў, якія яшчэ з савецкага часу мелі асфальтавае пакрыццё, цяпер там ехаць нельга, а народ едзе па абочынах, – падкрэслівае прадстаўнік аб'яднання «За аўто».
Кавалкін: Плаціць штраф больш выгадна, чым збор
На думку кіраўніка праекта «Кошт урада» Уладзіміра Кавалкіна, беларускія ўлады могуць звярнуцца да тэхнічных навінак, каб павялічыць збіральнасць транспартнага падатку.
– Яны могуць, да прыкладу, паставіць аўтаматычныя рэгістратары для счытвання нумароў, каб з плыні можна было выбіраць машыны, якія не прайшлі тэхагляд – і, адпаведна, выпісваць ім штрафы, – кажа экспэрт.
Больш таго, чыноўнікі могуць павялічыць штрафы, каб у людзей было больш стымулаў плаціць збор, чым штраф.
– Сёння плаціць штраф больш выгадна, чым збор, таму блізу 30% не праходзяць тэхагляд, проста таму што не бачаць у гэтым ніякага сэнсу, – адзначае эканаміст.
Улады Беларусі, пачынаючы з 2007 года, калі быў скасаваны падатак з продаж паліва, які ішоў у Дарожны фонд, прынялі пастанову замяніць яго акцызам.
– Спачатку акцыз ішоў у бюджэт і затым на дарогі. Тым не менш, пазней гэтыя грошы сталі пускаць на іншыя патрэбы. Гэта значыць, людзей проста падманулі, — тлумачыць Уладзімір Кавалкін. — Потым з'явілася дзірка ў бюджэце і ўзнікла неабходнасць уводзіць збор за допуск да руху. Але і гэта не канец гісторыі. Калі прэзідэнт асабіста сказаў пра тое, што ўся гэтая мыта пойдзе на будаўніцтва дарог і капрамонт, то цяпер грошы адтуль ідуць і на бягучы рамонт. Гэта значыць, сродкі пачынаюць распыляцца на нямэтавыя патрэбы.
Пры такім падыходзе ні аб якой якасці дарог казаць не даводзіцца, рэзюмуе суразмоўца.