Politico: Што, калі Дональд Трамп разыграў Крэмль?

Дзіўнае «ператварэнне» Трампа скончылася ў лічаныя дні.

«З таго часу, як кіраўніцтва амерыканскіх спецслужбаў абвінаваціла Расею ва ўмяшанні ў лістападаўскія прэзідэнцкія выбары, прэзідэнту Дональду Трампу даводзіцца аспрэчваць абвінавачванні ў тым, што ён - марыянетка Крамля, - адзначае Марк Бэнэтс у Politico (пераклад - inopressa.ru). - Ёсць і іншае тлумачэнне ўмяшання Крамля. Яно можа здацца нелагічным, але праз адсутнасць відавочных довадаў таго, што Трамп знаходзіцца «ў кішэні ў Пуціна», не менш праўдападобнае. Што, калі Трамп разыграў Пуціна?»

«Разгледзім версію, што Трамп падмануў Крэмль туманнымі шматспадзеўнымі заявамі ў крытычных для Расеі пытаннях, такімі як зняцце эканамічных санкцый і прызнанне Крыма расейскім, а сам не збіраўся дзейнічаць у адпаведнасці з імі, - гаворыцца ў артыкуле. - У працэсе заваёвы Белага дома ён атрымаў бы, без усялякіх адкрытых просьбаў, садзейнічанне ў форме кібератакі і фальшывых навінаў».

«Гучыць цалкам надумана і бяздовадна? Дакладна. Але тое ж можна сказаць і пра частыя сцвярджэнні, што Трамп - маньчжурскі прэзідэнт, кожны ход якога кантралюецца з Масквы з дапамогай кодавых паведамленняў. І нядаўняя змена пазіцый Трампа, якія раней былі спрыяльнымі для Крамля, робіць больш імаверным тое, што Пуцін з самага пачатку з'яўляўся пешкай у гэтай гульні», - заяўляе аўтар.

«Дзіўнае ператварэнне Трампа з героя ў злыдня скончылася на мінулым тыдні, калі ён паабяцаў зрабіць амерыканскі ядзерны арсенал «самым найлепшым у калодзе», на што Масква адказала папярэджаннямі аб новай гонцы ўзбраенняў», - нагадвае журналіст.

«Расчараванне Расеі відавочнае, - гаворыцца далей. - Той гэта Трамп, які здаваўся такім шматабяцальным падчас перадвыбарчай кампаніі? Той гэта чалавек, які хваліў Пуціна як моцнага лідара і груба намякаў, што раздзеліць «састарэлы» Паўночнаатлантычны альянс? Дзе Трамп, у гонар перамогі якога на выбарах яны пілі шампанскае?»