Паралімпіец, які прыдумаў акцыю Фомачкіна, пабудуе катэдж у «Драздах»

Менскі гарвыканкам вызначае гаспадароў апошніх свабодных участкаў у былой вёсцы Вяснінцы, або так званым пасёлку «Дразды-2».

Нагадаем, у кастрычніку 2016 года зямельны ўчастак у гэтым раёне дастаўся кіраўніцы Адміністрацыі прэзідэнта Наталлі Качанавай. Як стала вядома nn.by, раздача элітнай зямлі працягнулася.

Новым жыхаром «Драздоў-2» стане 49-гадовы старшыня Паралімпійскага камітэта Беларусі Алег Шэпель.

Рашэнне Менгарвыканкама №400/1 аб выдзяленні 15 сотак зямлі ў водаахоўнай зоне датуецца 2 лютага 2017 года.

Нагадаем, зямля пад будаўніцтва катэджа ў Менску павінна размяркоўвацца наступным чынам: спачатку яе павінны прапанаваць шматдзетным сем'ям з чаргі на паляпшэнне жыллёвых умоў. Калі ахвочых няма, участак выстаўляецца на аўкцыён. Участак Шэпеля ў свабодны доступ не трапляў.

Найбліжэйшымі суседзямі старшыні Паралімпійскага камітэта стануць вышэйзгаданая Наталля Качанава, а таксама беларуска-расейскі касманаўт Алег Навіцкі.

Дом Шэпеля будзе знаходзіцца прама за домам Качанавай. Пакуль будаўніцтва яшчэ не пачыналася.

Хто такі Алег Шэпель? Ён нарадзіўся ў вёсцы пад Быхавам ў 1969 годзе. У раннім узросце страціў маці, а бацька скіраваў яго ў Шклоўскі дом-інтэрнат для дзяцей з аслабленым зрокам. Алег займаўся спортам і трапіў у каманду СССР, у складзе якой перамог на Паралімпіядзе. Усяго ў Шэпеля пяць залатых медалёў у савецкай і беларускай нацыянальных камандах. Таксама ў біяграфіі згаданыя перамогі на чэмпіянатах свету і Еўропы па міні-футболу.

Пасля таго як Шэпель узначаліў таварыства інвалідаў па зроку (16 тысяч чалавек), то ўшчыльную заняўся бізнэс-структурай БелТІЗ — вытворчасць рознай тэхнікі, электрабытавых прыбораў, цвікоў... Акрамя таго, таварыства валодае і сеткай гатэляў.

З 2002 года Шэпель узначальвае Паралімпійскі камітэт. Летась ён адзначыўся ў скандале, паабяцаўшы выйсці на цырымонію адкрыцця Гульняў-2016 не толькі з беларускім, але і расейскім сцягам у знак салідарнасці з расейцамі, дыскваліфікаванымі за ўжыванне допінгу. Сам Шэпель ажыццявіць перфоманс не адважыўся і дэлегаваў прызначаную акцыю Андрэя Фомачкіна.

Сам Фомачкін атрымаў кватэру ў Падмаскоўі. А Шэпелю дастанецца дом у «Драздах-2».