Фотафакт: Вуліцы ў Рэчыцы ператварыліся ў азёры

Жыхары абураныя няздольнасцю ўладаў зрабіць нармальныя дарогі.

Чытач media-polesye.by звярнуўся ў рэдакцыю сайта з просьбай апублікаваць здымкі адной з вуліц працоўнага пасёлка Рэчыцы, каб звярнуць увагу ўладаў на стан дарог у гэтым населеным пункце.

Валерый Сівец, які звярнуўся ў рэдакцыю сайта, жыве ў Лунінцы, аднак у Рэчыцы бывае даволі часта. У рабочы пасёлак ён спяшаецца да маці-пенсіянеркі. Мужчына абураны тым, што шмат гадоў ужо нічога не мяняецца на 6-м Столінскім завулку, дзе жыве ягоная мама.

- Як не было там нармальнай дарогі гадоў сорак назад, так няма яе і цяпер. Нічога не мяняецца. Вада, бруд стаяць на дарозе. Людзям даводзіцца ісці ўздоўж парканаў і трымацца за іх, каб не выпацкацца ў гразі. А што ўжо казаць, калі ідзеш у цёмны час сутак? Тут жа і дзеці ходзяць, - кажа Валерый Сівец. - Калгасныя машыны раней разбівалі дарогу, а цяпер аб'язджаюць. Чаму ўлады не звяртаюць ніякай увагі на гэтыя завулкі? Што робіць «дэпутат», якога выбралі ад Столінскага раёна? Ён жа да гэтага ўзначальваў дарожную арганізацыю. Павінен усё ведаць і разумець.