«Крама» паўторыць юбілейны канцэрт у Менску
- 18.03.2017, 19:35
- 34,318
Легендарны гурт дасць вясновы канцэрт у бровары «Сябры» 26 сакавіка.
Са слоў лідара гурта Ігара Варашкевіча, гэта першы канцэрт у такім фармаце, але гурт плануе і ў далейшым збіраць сяброў і прыхільнікаў творчасці ранняй вясной, паведамляе tut.by.
У аматараў сапраўднага класічнага року і беларускай музыкі, хто на нейкія прычыны не змог павіншаваць «Краму» з 25-годдзем ў Prime Hall, ёсць магчымасць праслухаць юбілейную праграму 26 сакавіка.
Варашкевіч расказаў, што юбілейны канцэрт у Prime Hall планавалася здымаць на відэа. Але падчас канцэрту здарылася катастрофа - завіс лічбавы гукавы пульт, і гук быў запісаны з бракам.
«Сутнасць не ў тым, хто быў вінаваты ў той сітуацыі, а ў тым, што ўжо нічога нельга зрабіць. Было шмат ідэй, напрыклад, выканаць гэты канцэрт у студыі. Мы ад яе адмовіліся, бо гэта будзе не сумленна. Таксама была ідэя дацьаць гэты ж канцэрт у пустым Prime Hall, але, вядома, энэргетыка будзе зусім не тая, і мы таксама ад гэтага адмовіліся», - распавёў Варашкевіч.
Перабраўшы мноства ідэй, гурт наважыў паўтарыць юбілейную праграму на вясновым канцэрце ў надзеі, што гэтым разам з гукам будзе ўсё добра. Атрыманы гук будзе змантаваны з відэа, знятага ў лістападзе 2016 года.
«Канцэрты бываюць розныя, але гэта быў адзін з тых рэдкіх канцэртаў, калі ты проста купаешся ў гуку, выходзіш - з першай песні ў цябе кантакт з залай, і свята доўжыцца дзве гадзіны. Таму страчваць яго нельга, і мы наважылі пайсці на такі кампраміс. Усё будзе сумленна. Проста гук будзе з другой пляцоўкі», - падзяліўся Варашкевіч.
Адзінае адрозненне - на вясновым канцэрце не будзе запрошаных гасцей для выступу з «Крамай» на адной пляцоўцы, як гэта было ў Prime Hall.
«Гэта фізічна немагчыма. Мы, уласна кажучы, і ўвесь канцэрт не зможам паўтарыць, бо ёсць песні, выкананыя ад пачатку і да канца, як на плыце, пад метраном, а ёсць песні, якія маюць свой канцэртны варыянт: «Гэй, налівай», напрыклад, «Што дапаможа нам», дзе з залай ёсць пэўныя пераклічкі, там, дзе мы спяваем разам. На кожным канцэрце гэта адбываецца па-рознаму, і паўтарыць гэта немагчыма, тут законы матэматыкі не дзейнічаюць», - падзяліўся лідар «Крамы».
Калектыў спадзяецца, што дзякуючы «вясноваму канцэрту» можна будзе ўратаваць хоць бы 70% ад юбілейнага. Варашкевіч таксама адзначыў, што, магчыма, з цягам часу ў вясновых канцэртаў з'явіцца свая асаблівая тэматыка.
Купіць квіткі можна тут.
Квіткі ад 20 да 30 руб.
Інфалінія: 44-5-517-706, 29-8-517-706.