Дырэктар ФБР пацвердзіў расследаванне ўмяшання Расеі ў выбары

Спецслужбы ЗША ў сакрэтным парадку праінфармуюць лідараў Кангрэсу пра вядзенне расследавання.

Дырэктар ФБР Джэймс Комі пацвердзіў, што спецслужбы ЗША вядуць расследаванне ўмяшання Расеі ў прэзідэнцкую выбарчую кампанію ў 2016 годзе. Аб гэтым ён заявіў падчас слуханняў у камітэце выведкі палаты прадстаўнікоў Кангрэса ЗША, якія праходзяць у Вашынгтоне, паведамляе «Радыё Свабода».

Комі паведаміў, што звычайна ФБР не пацвярджае, што адбываецца расследаванне. Аднак у выключных выпадках такое магчыма і ў гэтым выпадку такое выключэнне робіцца. Комі пацвердзіў, што будзе дадзеная ацэнка ўмяшанню. Ён паведаміў, што ўсе абставіны расследавання будуць сакрэтнымі, і ён не будзе паведамляць, хто ў гэтым удзельнічае. Комі сказаў, што ФБР у сакрэтным парадку праінфармуе лідараў Кангрэса пра расследаванне.

Ва ўступным слове кангрэсмэн Дэвін Нунэс заявіў, што падчас расследавання варта высветліць, хто перадаваў сакрэтную інфармацыю Расеі. Нунэс заклікаў усіх, хто мае інфармацыю пра актуальнае пытанне падаць яе камітэту выведкі.

Кангрэсмэн-дэмакрат Адам Шыф паведаміў ва ўступным слове, што замежная дзяржава, Расея, умешвалася ў ход выбарчай кампаніі ў ЗША ў 2016 годзе, выкарыстоўваючы кампутарныя ўзломы і выцекі сакрэтнай інфармацыі.

Шыф адзначыў, што "расейцы паспяхова ўмешваліся ў амерыканскую дэмакратыю і зрабілі гэта не ўпершыню і будуць прадаўжаць гэта рабіць у тым ліку і ў Еўропе". Шыф заклікаў высветліць, як гэта робіцца і заявіў, што "пакуль мы не зразумеем, як яны робяць гэта, мы зможам вінаваціць у тым, што адбываецца толькі саміх сябе". Шыф падкрэсліў, што многае аб удзеле Расеі невядома ў тым ліку і тое, як у шкодных дзеяннях удзельнічалі грамадзяне ЗША. Важна будзе высветліць ці правільна дзейнічаў урад у дачыненні да ўмяшання Расеі ў выбарчую кампанію, сказаў Шыф.