Зміцер Бандарэнка: Я па-ранейшаму перакананы, што да канца года Лукашэнкі не будзе ва ўладзе
13- 27.03.2017, 17:06
- 36,607
Зняцце персанальных санкцый з сотняў чыноўнікаў і сілавікоў рэжыму Лукашэнкі было памылкай.
Пра гэта заявіў у каментары выданню «Гордан» каардынатар грамадзянскай кампаніі «Еўрапейская Беларусь» Зміцер Бандарэнка.
«Лукашэнка абвясціў вайну цэламу народу. Але дух беларусаў не зламаны. Сярэднявечныя метады ўжо не працуюць. Людзі арганізуюцца, і Лукашэнка нічога не зможа зрабіць. Гэта не 2010 год. Ужо іншыя настроі і эмоцыі. Было бачна, што людзі свядома ішлі ў аўтазакі. Гэты мірны негвалтоўны пратэст калі-небудзь усё адно пераможа. І я па-ранейшаму перакананы, што да канца года Лукашэнкі не будзе ва ўладзе», - адзначыў Бандарэнка.
На ягоную думку, Лукашэнка спалохаўся акцый пратэсту, якія прайшлі ў Беларусі.
«Мы ўбачылі паранаідальны панічны страх дыктатара, які разумеў: першае - калі не кінуць усе сілы (міліцыю, вайскоўцаў, спецслужбы), то людзей выйдзе вельмі шмат. Дыктатар спалохаўся і ужыў неадэкватную сілу да свайго народу. Другое - 25 Сакавіка мог стаць днём здабыцця суб'ектнасці беларускім народам і беларускай апазіцыяй, бо гэтыя пратэсты былі персаналізаванымі і звязанымі з імем лідара Беларускага нацыянальнага кангрэса Мікалая Статкевіча, які ўзяў на сябе адказнасць за гэтую акцыю», - падкрэсліў апазіцыянер.
Ён мяркуе, што Захад заўчасна зняў санкцыі з атачэння Лукашэнкі.
«Вэрхал у Беларусі магла б спыніць салідарная пазіцыя Захаду і суседніх краін, у тым ліку Украіны. Палітыка Еўразвязу, Польшчы, Украіны ў дачыненні да беларускага дыктатара з мэтай падаць яму моркву цалкам правалілася. Здыманне персанальных санкцый з сотняў чыноўнікаў і сілавікоў рэжыму Лукашэнкі было памылкай. Але еўрапейцы аддалі перавагу сябраваць з Лукашэнкам, каб праз Беларусь займацца кантрабандай у РФ. Мы неаднаразова папярэджвалі: вы падзеліце адказнасць за дзеянні Лукашэнкі, бо калі бандытаў заахвочваць, яны абавязкова пойдуць на новае злачынства. А цяпер, калі выявілася сапраўднае аблічча Лукашэнкі, я бачу шок у Польшчы. Прэзідэнт, кіраўнік Сената, МЗС вельмі здзіўленыя», - рэзюмаваў Бандарэнка.