Ашчадны банк прадаў украінскую «дачку» беларуска-латвійскаму кансорцыуму за $130 мільёнаў

Перамовы з кансорцыумам Ашчадбанк вёў з канца 2016 года, першапачаткова была заяўленая вялікая сума ўгоды.

Сума ўгоды па продажы ўкраінскай «дачкі» Ашчадбанка латвійскаму банку і беларускай кампаніі склала крыху менш за яе капітал — прыкладна 130 мільёнаў даляраў, паведамляе газета «Коммерсант» са спасылкай на свае крыніцы.

«Са слоў крыніц «Коммерсанта», гаворка ідзе прыкладна пра $130 млн. Гэта супастаўна з капіталам ўкраінскага ПАТ «Ашчадбанк», які, згодна з міжнароднай справаздачнасцю за студзень-верасень 2016 года, складае $144 млн (больш познія звесткі адсутнічаюць). Усе сродкі, са слоў крыніц «Коммерсанта», паступяць пакупніку адразу пасля ўваходжанне ў дзеянне дамовы куплі-продажу. Паводле паведамлення Ашчадбанка, угода павінна быць закрытая да канца першага паўгоддзя», — піша выданне, адзначаючы, што сума ўгоды афіцыйна не раскрывалася, а бакі каментаваць дэталі ўгоды адмовіліся.

Перамовы з кансорцыумам Ашчадбанк вёў з канца 2016 года, піша tut.by. Першапачаткова была заяўлена вялікая сума ўгоды (раней патэнцыйныя пакупнікі ацэньвалі ўкраінскую «дачку» Ашчадбанка ў 450-680 млн даляраў. — заўв.), але на цану паўплывалі санкцыі супраць расейскіх банкаў, уведзеныя украінскім прэзідэнтам Пятром Парашэнкам у сярэдзіне сакавіка, а таксама блакаванне аддзяленняў офісаў радыкаламі ў розных гарадах Украіны. Гэта прывяло да таго, што ашчадны Банк саступіў у цане для таго, каб паскорыць угоду.

Таксама Рыгор Гусельнікаў у эфіры радыё «Эхо Москвы» заявіў, што пасля завяршэння ўгоды продажу ўкраінскай «дачкі» Ашчадбанка актыў будзе перайменаваны ў Norvik Bankа, асноўным акцыянерам якога ён з'яўляецца.

«Ён будзе перайменаваны. Відавочна, ён будзе насіць імя Norvik Bankа, таму што ён будзе даччыным у дачыненні да еўрапейскага Norvik Bankа», — сказаў Гусельнікаў. З ягоных слоў, змена брэнда спрацуе ў інтарэсах і пакупніка, і прадаўца.

Нагадаем, напярэдадні Ашчадбанк Расеі абвясціў продаж украінскай «дачкі» кансорцыуму інвестараў — Норвік Банк (Norvik Banka, Латвія) і беларускай прыватнай кампаніі.

Мажарытарным акцыянерам кансорцыума, што дамовіўся аб куплі ўкраінскай «дачкі» Ашчадбанка, стаў сын Міхаіла Гуцарыева Саід. Менавіта яму належыць неназваная беларуская кампанія, якая ўдзельнічае ў пагадненні.

Другім удзельнікам кансорцыуму стаў латвійскі банк Norvik Banka, яго асноўным акцыянерам з'яўляецца грамадзянін Вялікабрытаніі Рыгор Гусельнікаў, былы прэзідэнт Бінбанка, які падкантрольны сям'і Міхаіла Гуцырыева.

Рыгор Гусельнікаў (праз Norvik Banka) набудзе 45%, Саід Гуцарыеў — 55% украінскай «дачкі» Ашчадбанка.