«Зялёныя»: Дэлегацыю Еўрапарламенту не пусцілі на БелАЭС, бо ёсць што ўтойваць

Намеснік старшыні партыі «Зялёныя» распавёў, чым матываваная адмова беларускіх уладаў дапусціць дэлегацыю Еўрапарламента да БелАЭС.

Дэлегацыі Еўрапарламента не дазволілі наведаць Беларусь. Прадстаўнікі фракцыі «Зялёных» у Еўрапейскім парламенце на чале з Рэбекай Хармс збіраліся сустрэцца з беларускімі ўладамі і падняць пытанні вакол будаўніцтва Астравецкай АЭС, паведамляе «Радыё Рацыя».

«Адмова ва ўездзе ў Беларусь сведчыць аб тым, што беларускія ўлады не гатовыя да дыялогу з Еўропай», - кажа першы намеснік старшыні Беларускай партыі «Зялёныя» Дзмітрый Кучук:

- Будаўніцтва атамнай станцыі знаходзіцца ў палітычнай плашчыні абмеркавання ў Еўрапарламенце на ўзроўні правоў чалавека і свабодных выбараў. Вядома, калі б дэпутатаў пусцілі, то, магчыма, нейкія непаразуменні былі б знятыя і быў бы пабудаваны нейкі дыялог паміж уладай і Еўрапарламентам. Нашы ўлады дэкларуюць аб тым, што ўсё адкрыта, усё можна паглядзець, але гэта толькі на словах, а справамі гэта не пацвярджаецца. Гэта мы звязвае перш за ўсё з тым, што ёсць што ўтойваць. У афіцыйным адказе беларускай амбасадзе гаворыцца, што беларускі бок не бачыць магчымасці для арганізацыі патрэбных сустрэч праз недахоп часу. Аднак самі еўрапарламентарыі бачаць прычыну адмову ў рэзалюцыі Еўрапарламента, якая асуджае нядаўнюю хвалю рэпрэсій у Беларусі.