У Вілейцы «дармаедаў» адпраўляюць збіраць камяні на палях

На днях працоўную павіннасць распаўсюдзілі і на работнікаў прадпрыемстваў і арганізацый.

Беспрацоўныя ўдзельнічаюць ва ўборцы камянёў на палях Вілейскага раёна каля двух тыдняў, работнікаў арганізацый і прадпрыемстваў падключылі на днях, паведамляе рэгіянальны сайт kraj.by.

Беспрацоўная жыхарка Вілейкі Таццяна (імя жанчыны зменена на яе просьбу) прыбірала ў полі камяні двойчы. Апошні раз – у панядзелак, 10 красавіка. Працавала ў Даўгінава.

– На камяні я ездзіла ад біржы працы. У аддзеле занятасці прапанавалі толькі такую працу, бо на пасадку елак людзей ужо накіравалі, – распавяла Таццяна нашаму парталу. – Выязджаем мы а 8.00 і збіраем камяні да 16.00. З 13.00 да 14.00 у нас абед. Ідзем за трактарам і кідаем у кузаў камяні. Вялікія прыбіраюць мужчыны, жанчыны бяруць лягчэйшыя. Трапляліся ўсякія, па 2-3 кілаграмы. Едзем мы, вядома, ад безвыходнасці, каб хоць нейкую капейку зарабіць, – адзначае Таццяна.

Збіраць у поле камяні – праца няпросты, прызнаецца жанчына. З ейных слоў, у дзень паабяцалі па 10 рублёў, але, кажа Таццяна, праца вельмі цяжкая, таму беспрацоўныя прасілі старшыню калгаса «даць хоць па 15». Нейкую пэўную норму беспрацоўным не ўсталёўваюць.

Жанчына дадала, што камянямі палі абсыпаныя, таму «да канца месяца працы дакладна хопіць».

12 красавіка ў групе «Гэта Вілейка, дзетка» у сацсетцы «ВКонтакте» віляйчане актыўна абмяркоўвалі тэму збору камянёў у полі і цікавіліся, чаму гэта робіцца ўручную.

Таксама карыстальнікі адзначалі, што на ўборку камянёў сталі адпраўляць і работнікаў арганізацый і прадпрыемстваў. Напрыклад, 13 красавіка ў поле павінны былі ехаць супрацоўнікі адной з дзяржарганізацый горада, але праз дождж усе засталіся на сваіх рабочых месцах. Журналістам удалося даведацца, што на гэтым тыдні камяні збіралі работнікі завода «Зеніт», Вілейскага хлебазавода, камбікормавага завода, «Буддэталяў» і іншых прадпрыемстваў.

Першы намеснік старшыні Вілейскага райвыканкама: «Няма нічога страшнага ў тым, што людзі два дні з'ездзілі ў поле»

Першы намеснік старшыні райвыканкама, начальнік упраўлення сельскай гаспадаркі і харчавання Ігар Шавялёў на момант званка журналістаў знаходзіўся ў дарозе, але не адмовіўся пагутарыць з журналістам.

Ён адзначыў, што збор камянёў у полі – нармальны штогадовы працэс, і прыбіраюць камяні не толькі на палях Вілейскага раёна, але і па ўсёй Менскай вобласці адначасова з пасевам, «каб не загубіць тэхніку».

– У нас ёсць распараджэнне старшыні аблвыканкама аб шэфскай дапамозе сельгаспрадпрыемствам на ўборцы камянёў. І няма нічога страшнага ў тым, што людзі на два дні з'ездзілі ў поле, папрацавалі на прыродзе. Я таксама студэнтам камяні збіраў і нічога! – сказаў Ігар Шавялёў.

Ён таксама распавёў, што камяні прыбіраюць кожны год, «а яны ўсё роўна растуць».

– Людзі, што працуюць у полі не носяць вялікія камяні, гэта робіць спецыяльная камнеуборочная тэхніка, – удакладняе Шавялёў. – Тэхніка бярэ камень, пачынаючы ад памераў футбольнага мяча. А дробныя, якія могуць потым трапіць у касілку або камбайн, ужо збіраюць людзі. І гэтыя камяні невялікія, залазяць у руку. Спецыяльнай тэхнікі, якая збірала б камяні такога памеру, – няма. Асабіста я не сустракаў ні ў вобласці, ні ў краіне.

З ягоных слоў, беспрацоўныя працуюць на ўборцы камянёў прыкладна два тыдня, а работнікі арганізацый і прадпрыемстваў – даслоўна два дні. Якія менавіта прадпрыемствы ўдзельнічалі ў зборы камянёў, Ігар Шавялёў не назваў, але дадаў, што «ў працэсе ўдзельнічаюць і работнікі кожнай гаспадаркі, і бухгалтары, і горад папрасілі дапамагчы».

Задзейнічаныя на ўборцы камянёў работнікам прадпрыемстваў за дзень плацяць іх сярэдні заробак, адзначыў Ігар Шавялёў. Усіх работнікаў гаспадаркі кормяць абедам, меню ўзгадняецца з санстанцыяй.

Уборка камянёў праходзіць адначасова з пасяўной, якую плануюць завяршыць да 20 красавіка. Тады ж скончаць і з уборкай камянёў, заключыў першы намеснік старшыні райвыканкама.