«Віцебскдрэў» напрацаваў на $2,5 мільёна страт
15- 14.04.2017, 15:41
- 21,049
Колькасць работнікаў на прадпрыемстве скарацілася на 17%.
Адкрытае акцыянернае таварыства «Віцебскдрэў» скончыла 2016 год са стратамі, колькасць работнікаў на прадпрыемстве скарацілася на 17%.
Згодна з апублікаванай на сайце прадпрыемства гадавой справаздачай, за мінулы год «Віцебскдрэў» панёс страты сумай 5 238 000 рублёў. Пры гэтым адкрытае акцыянернае таварыства выдаткавала на выраб прадукцыі 23 614 000 рублёў, а прадаць сваіх вырабаў змагло толькі на 22 398 000 рублёў, пішуць «Народныя навіны Віцебска».
Таксама за 2016 год адбылося значнае скарачэнне колькасці работнікаў прадпрыемства, так, калі ў 2015 годзе на «Віцебскдрэве» працавалі 1192 чалавекі, то летась ужо толькі 990.
Тэрміны мадэрнізацыі ААТ «Віцебскдрэў», якая праходзіла падчас «губернатарства» Аляксандра Косінца, неаднаразова зрываліся, была нават распачатая крымінальная справа. Аднак і пасля ўвядзення ў строй лініі для вытворчасці пліт МДФ/ХДФ прадпрыемства прадаўжае адчуваць цяжкасці.
Так у канцы 2015 года кіраўніцтва «Віцебскдрэва» жалілася віцэ-прэм'еру на страту рынкаў збыту праз высокую затратную частку вытворчасці: у сабекошце драўняных пліт 60% займаюць энэрганосьбіты і 17% складае кошт драўніны.
Тады ж Анатоль Юхнавец папрасіў ва ўрада садзейнічання ў крэдытаванні прадпрыемства, бо банкі перасталі даваць грошы заводу, што нясе страты.