Незабыўныя кадры Менскай вясны

26 красавіка 1996 года дзесяткі тысяч беларусаў выйшлі на «Чарнобыльскі шлях».

26 красавіка ў 10-ю гадавіну катастрофы на Чарнобыльскай АЭС у Менску адбылося масавае шэсце па праспекце Францішка Скарыны ад Акадэміі Навук і мітынг апазіцыйных сіл, нагадвае сайт 90s.by.

У ім удзельнічала больш за 60 тысяч чалавек. На мітынгу выступіў Зянон Пазняк, які нелегальна вярнуўся ў Беларусь (пасля акцыі ён зноў павінен пакінуць краіну). Мітынг быў адзначаны хвілінай маўчання ў памяць пра забітага Джахара Дудаева.

Улады забаранілі акцыю і кінулі на падаўленне пратэсту спецатрады: АМАП, спецназ, армейскія падраздзяленні. На вуліцах Менска адбыліся жорсткія сутычкі са спецназам. Блізу 100 чалавек пацярпелі, былі параненыя. Пасля мітынгу каля Палаца спорту пачаліся арышты. Блізу 23 гадзін спецслужбы напалі на штаб-кватэру БНФ. Быў затрыманы дэпутат Вярхоўнай рады Павел Знавец.

«Чарнобыльскі шлях» стаў найбуйнейшай акцыяй Беларускай вясны 1996 года і на доўгія гады – сімвалам гераічнага супраціву рэжыму Лукашэнкі.