Каму не трэба будзе плаціць за знаходжанне ў памежнай паласе

Падпісаны ўказ, які тлумачыць парадак знаходжання ў памежнай зоне і памежнай паласе.

Напрыклад, ён прапісвае, хто не павінен будзе плаціць за наведванне памежнай паласы, піша tut.by.

Мінулай восенню гаварылася, што з 1 студзеня 2017 года наведванне памежнай зоны для беларусаў стане бясплатным, а пропускі ў памежнай паласе будуць дзейнічаць не год, а два.

Падпісаны ўказ №132 вызначае, якія катэгорыі грамадзян вызваляюцца ад выплаты падатку за ўезд у памежную паласу, а таксама прапісвае іншыя моманты.

Так, з 1 студзеня 2017 года скасаваны дзяржаўны падатак за ўезд (уваход), часовае знаходжанне, перамяшчэнне ў памежнай зоне для грамадзян нашай краіны, замежных грамадзян і асоб без грамадзянства, якія стала пражываюць у Беларусі.

Той жа закон уводзіць аплату дзяржаўнага падатку за выдачу пропускаў у памежную паласу. Але плаціць павінны не ўсе. Напрыклад, гэта не тычыцца тых, хто ў памежнай паласе выконвае працоўныя (службовыя) абавязкі, наведвае месца пахавання сваякоў, валодае нерухомай маёмасцю. Не трэба аплачваць падатак і ўдзельнікам вайны і сваякам вайскоўцаў, якія служаць у памежных войсках.

Новы ўказ зацвярджае пералік дакументаў, на падставе якіх гэтыя катэгорыі грамадзян вызваляюцца ад неабходнасці аплачваць дзяржаўны падатак. Прычым гэтая льгота надаецца толькі ў межах канкрэтнай адміністрацыйна-тэрытарыяльнай адзінкі.

Прыезджыя замежнікі, якія не дасягнулі 14-гадовага ўзросту, вызваляюцца ад выплаты падатку за знаходжанне ў памежнай зоне, роўна як і грамадзяне Беларусі гэтага ж узросту за знаходжанне ў памежнай паласе.