Як Лукашэнка вучыў банкіра Румаса «бульбу перабіраць»

Пацешны эпізод адбыўся нядаўна з удзелам кіраўніка Беларусі.

Многія беларусы ведаюць папулярны ў мінулым анекдот, у якім Лукашэнка, праз тэлефон, дапамагае падначаленым перабіраць бульбу.

Успомніць пра яго прымусіў невялікі фрагмент сустрэчы дыктатара са старшынём праўлення Банка развіцця Сяргеем Румасам, піша «Салідарнасць».

Першапачаткова размова ішла ў асноўным на фінансавыя тэмы: банкір распавёў пра сітуацыю ў банкаўскай сістэме, а таксама пра праблемы беларускай эканомікі. Паступова гутарка ад фінансаў перайшла ў іншую вобласць, а менавіта, сельскай гаспадаркі.

Далей Лукашэнка з веданнем справы пачаў павучаць банкіра, як правільна весці сельскагаспадарчыя работы.

Між іншым, ён закрануў пытанне «севазвароту на меліяраваных землях, да якога трэба падыходзіць больш сур'ёзна». Высветлілася, пралятаючы над меліяраванымі землямі, Лукашэнка ўбачыў, што «прыкладна 30% азімых пасеваў загінула».

– Але чаму загінула? Таму што пасеялі азімыя на нізкіх глебах, меліяраваных, і там, натуральна, па вясне стаіць вада. Вымаклі пасевы. Пытаецца, навошта на такіх палях сеяць азімыя збожжавыя, там трэба было б лепш апрацоўваць травы, – даў параду банкіру кіраўнік.

Застаецца толькі спадзявацца, што Сяргей Румас, перш чым выконваць «каштоўныя» ўказанні зверху, спачатку параіцца папярэдне з прафесіяналамі.